Siring sa saiyang ipinanuga, nagpoon na panghanap nin fondo para sa mga Proyecto si Congressman Yoloyo minsan dae pa siya nakatukaw.
Segun sa mga bareta, kinaroy dagos ini ni TGP Cong Bong tanganing makahampang an mga tawong harani sa matukaw na bag-ong presidente.
Sa ngonian daeng makadaog sa Isla Maogma sa congresista nin Baras sa panghanap nin proyecto, minsan bako siya an gakapot kan fondo.
Daog pa ngani daa caini si Cong Hec, na magcapira na daang vez naloko kan saiyang mga kahoron na soboot malakas sa DBM o kung sisay na opisyal sa administrasyon ni Pay Digong.
Dae man ining problema kung amay pang namanwit sa Malacanang an satong bag-ong congressman, tibaad lamang sobra sa sagad an madara pagparibod.
Natural, caipuhan ngonang mabawi an pinanaltag na gratipikasyon na masobra sa P84 million, dae pa kabali an soboot tinabag kan mga armadong nagsalakay daa sa Batalay.
Ngonian, kung papan-ohon ini ni Cong Yoloyo, bahala na man siya asin an saiyang mga contratista pati na an macolecta kan daculang gratipikasyon, he!! he! he!
*****
An hapot kan ibang observador sa politica, ano na lamang daa an nangyari duman sa imbestigasyon sa nangyaring robbery holdup sa harong kan congresista pirang aldaw bago an eleksyon.
Afuera sa kapulisan kan Bato, nagtapsok pa an NBI sa isyu tanganing maisihan y maaresto an mga invuelto.
Sagcod sa ngonian, tolong semana matapos an insidente, dae pang report ang duwang agencia kung an insidente talagang nangyari, lalo na ta an mga kanatad daa kan congresista, dae man naniwara sa bareta.
Segun sa mga dae lisensyadong imbestigador, imposible daang dae nakaapod dagos sa Bato MPS an sarong guardiya sa gate na nakadulag.
Ta kung nakaapod daa ini, dae na makaluwas sa Bato población an mga mahabas ta maagui sa solamenteng dalan paluwas sa Batalay. ‘
Saro pa, daeng maniwara na an candidatong nagtago nin halos sanggatos milyones sa harong, dae mapahingayad kan saiyang CCTV system pakatapos sana kan mauyag ini kan bagyong Rolly.
Ano daw kung talagang drama sana an nangyari tanganing dae mauyaman kan votante sa pangakong dos mil quinientos na gratipikasyon?
Madari man sana sigurong hanapon an guardiyang binugbog kan mga suspetsado, ta aduman man sana sa Cavite o kung sain.
Herac man kan kapulisan nin Bato, dae masabotan kung ano an gigibohon.
*****
Sa mga mabiyahe ngonian na panahon papuntang Maynilang kayganda, mag-isip-isip na ngona.
Trapik daa ngonian sa Sta. Elena, Camarines Sur ta pigarungkab na naman kan DPWH an baldosa na baratak na.
Idagdag pa an pirming atrasadong viaje kan lantsa sa Calolbon, caya maabot man an mga bus sa PITX, hapon na kinaagahan.
Kung kulang an cuarta pambakal nin pagkaminahar na tiket kan Cebu Pacific, pasensiya sa bus asin an labing veinte cuatro oras na nakatugpo sa tukawan.
An importante, magbalon nin chichiria, tubig asin supot na plastic ta tibaad abuton kamo nin ihion sa tahaw kan viaje.
Harimbawang dae na papagharton an odoon o til-ison, parahon an bus sa medyo marinas-rinas man na lugar, ta tibaad mabidyohan pa kamo diyan na gadeposito sa uma o sa gilid ning kahoy, masikat kamo sa Facebook, he! he! he!
*****
Mayad pa daa si Atorni Puting Buhok ta nagkaigua na nin victory party minsan dae siya nanggana.
Duman pa daa sa sarong resort sa Virac an handa, igua pang acoustic band, y an visita an 2010 Miss Universe 4th runner up na si Venus Raj y pag-iriba.
An saiyang kalaban na si Cong Yoloyo naghanda pero sa compleanyo niya. Nanghagad pa ngani daa nin inumon sa contratista ta tinubis daa kan mga soboot mahabas an mga maklaseng alak sa harong caini kan Mayo 3.
Noarin man daw mangimbitar an duwang Cua y pag-iriba?
abaca festival
byahe sa lantsa, bus
naamay sa panghanap ning fondo si Cong Yoloyo