Sa pahina cinco kan isyung ini, adyan an forma na puedeng guntingon para gamiton na codigo sa pagvoto sa eleksyon sa Mayo nueve. Italtag an sobra sa saendong mga kapamilya na votante man, lalo na mariringawon na.
Isurat an pangaran nindo asin kopyahon an numero kan presinto sa itinao kan COMELEC na Voter’s Information Sheet.
Habang amay pa, magpoon na pagsurat kan mga numero y apelyido kan mga napiling candidato tanganing pag-abot sa masunod na Lunes, handa na kamo mangahang sa voting center. Idara an codigo asin pagtukaw sa laog kan presinto, duman na maghiling kan saendong bobotohan sa paagui nin pag-shade sa blangkong oval.
Sa paaguing ini, marikayan ta an pagkasayang kan sagradong voto.
*****
Nagkurukay na an mga candidato sa manlaenlaen na banwaan.
An sarong tahodan na bocal sa East district nanaltag na nin sabon. Pirming sabon an pigatao caini ta igua siguro ining factory nin sabon, he! he! he!
An saro man na barik-barik nang PBM, shampoo man an tinaltag sa Virac asin sa Caramoran.
Alagad daog sinda kan goslab na bocal na dae gahidap sa pamakal nin voto, tigsarong balde nin gamit panlaba.
An mga candidatong consejal daa sa Viga y Bato nagbubod na man.
Sa kahadean ni alcalde Johnny, mananggatos an pigabahog sa mga orig-orig. Duman sa lugar ni Mayor Tarin, maningcuenta sana daa.
An problema, kung sobra sa walo an nanaltag nin kaparehong manang o maning, iguang matakdag y makusay-kusay sa Mayo diez, he! he! he!
An dati daang alcalde na gaambisyon na sipaon si Cong Hec sa tocawan, aquinientos daa an sabwag alagad dae pa man daa ini kumpirmado.
An cierto daa an panao kan dating congresista nin berdeng membership card ning Anak Kalusugan partylist, alagad dae nasabotan kan mga votante kung saen ini hahanapon an partylist harimbawang sinda mangaipo nin tabang.
Sa mga gahalat na kan saendang mejoras hare sa mga dati nang honorable y mga gustong maging honorable, mag-antabay sana tabi kita ta mapasyar sana an mga piniling Santa Claus kan mga candidato minsan matanga pang banggui an manoktok.
*****
Iguang reclamo an mga taga-Francia sa awat na daang pagsabod nin basura diyan sa ibong kan kudal nin capitolyo, sa rikod kan nasulong provincial jail.
Segun sa saenda, dae ninda nasabotan kung ngata sige an sabod nin basurang mabata diyan sa kanto kan capitolyo, lalo na ta lalo daang nagdadacul an mga boyongaw sa paribot.
Magayon na reparohon ini kan capitolyo ta tibaad matugpoan nin bangaw an bag-ong timplang kape…
*****
Bida si Atorni Puting Buhok sa nacaaguing debate duman sa CatSU auditorium.
Daeng darang codigo si Pay Oliver kan sabihon caini an saiyang plataporma asin simbagon an kahapotan kan panel.
An sainyang simbag sa kahapotan manongod sa divorce, sinabi ni atorni na bako siyang pabor sa divorce alagad natural na daa sa cadaclan na mga lalaki an mambabaye, basta dae sana pagbayaan an agom y familia, bagay na nakapangarakngak sa ibang candidatong dati nang iguang mga No. 2, No. 3, No. 4, and so on and so forth, he! he! he!
Dae na daa manaltag si atorni, ta sorobra na an saiyang voto sa pagka-congressman, he! he! he!
*****
Sagcod sa ngonian, dae pa palan naresolveran kan Ombudsman an kasong graft ni bise gobernador manongod sa dae nadagos alagad nabayadan na contrata sa rental nin toga kan 2020.
Segun sa osipon, sinuratan pa sana kan Ombudsman an COA na imbestigaran an reclamo ni Jing Rima, base sa soboot pagbayad nin halos cuatro cientos mil pesos sa sarong supplier nin toga kan Marso 2020, minsan dae man nin nangyaring graduation sa elementary y high school.
Programa daa ito kan bise gobernadora bilang asistencia sa mga magurang kan magraduar alagad inabot kan ECQ. Kung ngata dae pig-refund an binayad na cuarta, dae ta isi.