hare man pagtawadi

ang tunay na lucas*

kang taga-islang ini.

 

piga-bayaan

piga-ab’tan

pirming adian

ang saindang kagayonan;

simpleng pagbuhay,

pagsarig sa Kagurangnan.

 

piga-rapado ning bagyo;

piga-tilisan sa pungko;

piga-rukot ning suoy;

piga-sintup ning baha…

 

sening, yoling, reming;

bacong kastigo. Kundi –

pagpacusog ning pagtubod.

 

tabang ning iba?

hari sa mga parientes huba;

pero,dai nag sarig; ni naglaom

sa limos ning kinaban…

 

dai nagbaya sa harong na uyag;

dai nangluya sa nawarang kabuhayan;;

kundi, nagtindog sa sadiling cusog.

 

kamong mga layas

sa samuyang banwa,

 

hare pag-uyaga

ang samuyang isla!

 

—————————————————-

*LUCAS – tagas na pinatibay ning kalayo & tubig

(as in, “lucas ning tabak”)