Pag biglang mina-brown-out

Sa kamatagaan ning banggi,

Purbahing sa luwas magpahayahay

Namnamun ang gayon ning kadurman.

 

Taruka ang kadunungan kang kaglalang.

Pano nya tinarayud sa kalangitan

Ang saladatuy na mga bitoon

Na biyong ga ililap-ilap sa kadakulan?

 

Pano kinudal ning kapungkuhan

Ang paribut kaining islang paraiso?

Saen na burabod guminikan ang katubigan

Magsa sapa, salog, suba, kadagatan?

 

Pano nabilog ining orkestradang musika:

mga wikwik ning mga tururong,

ragitnit ning mga kawayan,

daruos ning kalungsuran,

kurahaw ning mga kuwaw,

tukturaok ning mga manok.

 

Sayang ang kagayunan ning kadurman,

Dai na apreciar ning kadaklan.

Pano, kung bacong nanok sa higdaan,

Ibang kagayunan ang natudan.

 

(Published in CT in 2010)