pag minaabot ang ripot

na biyong nananaruhot

sagcod sa rikod –

 

kidayad mangurumon

ning mahimbong na tamong

sa sadileng harong;

 

pero, harat….

 

dang’ga ang mga hagikhik

ning mga magturugang

sa payag na kawayan –

gasaranduyan, paaragawan

makakugos sa magurang;

 

hil’nga ang kamugtakan

mga nawar’an ning estaran:

binagyo, binahâ, tinilisan:

mayaman sa kakulangan,

nabubuhay sa tikapong pagkahelac.

 

matëa ang buhay

baging burabod, maski inano –

padagos ang sainyang buros

ngonian, adian sa ibaba:

pagkademukrasi, asa itaas man.