Pan-o tutungkadon ang Saimong kabanalan:

Ika na pinili ning Kahuruhalangkawe

Sa gabos na tawo. Dai ka pa namundag

Pinanô ka na ning grasya na sobra pa

Sa mga grasyang tinaó sa gabos na mga santos,

 

Ta minundâ kang maging Ina ning Paratubos,

Si Cristo Jesus, na mahingayad

Kang relasyon ning Dios sa tawo

Na inuyag ni Eva kasi Adan.

 

Pan-o ipapahayag ang pag omaw ko Saimo,

Ang lyu-iyong Inang Birhen Inmaculada

Na pinakadakula sa gabos na angeles boda santos

Na sinugo sa pinakabanal na misyon –

Ang mediatriz ning tawo sa Dios na pinagkasalaan.

 

Ika na ang yaman asa kakumbabaan,

Kabanalan saka riputok na pagtubod;

Hinubog sa sinapupunan kang santong

Mga magurang, si Joaquin saka si Ana;

 

Sa edad na tulong taon naglaog sa templo,

Ang burabod ning grasyang tinago sa kinaban;

Tanganing duman magdakula sa kabanalan.

 

Pagabót kang kapanuan ning panahon

Sinugô Saimo ning Kagurangnan

Ang Arkanghel na si Gabriel sa pagpahayag

Na ika, Maria, ang magiging Ina ning Paratubos!

 

O, inanong takot sa pagkabigla!

O, inanong ugma sa langitnon na bareta!

 

Dangan ang historiko Mong kasimbagan:

“Uya ang surugoon ning Kagurangnan,

Mangyari man lugod susod sa saimong itinaram”.

(Lk 1:38)

 

Dangan nangyari ang gabos

Susod sa Banal na Plano ning Dios.

 

__________________________

 

Hinabur hare sa mga torsido kang libro ni San

Alfonso de Leguon, “The Glories of Mary”, 1931

 

Published in the Tribune on Dec. 10, 2008