Naguibohan na palan nin designation an anom na tawong pignombraran ni gobernador bilang kasalida kan mga nasuspendong mga bocal nin Lakas-CMD.
Napirmahan na daa ni DILG Sec. Jonvic Remulla an saendang pormal na designation bilang mga PBM ma representar sa Lakas sa Sangguniang Panlalawigan, ini minsan nunca sinda naging miembro nin partido political, afuera na sana qui dating PBM Oyong Angeles.
Segun sa osipon, hinagadan pa daa ni Remilla nin Lakas-CMD membership ID an mga anom na aduman sa listahan ni Gob Pata.
Ini siguro tanganing mapatunayan na sinda talaga tunay na miembros kan partido ni dating Gob Boboy Cua bago pa man sinda kinahang sa listahan kan mga masalida sa mga nasuspending mga bocal.
Tibaas nakapresentar an mga ini nin ID card na pirmado ni national chairman Martin Romualdez o caya nagdaralagan sinda sa Recto tanganing makapagibo, he! he! he!
Dae man sigurong problema kung ginibohan kan dating House Speaker nin ID minsan isi nin gabos, pati kan mga votante sa Isla Maogma na an mga nasambit na tawo bako man mga miembro nin Lakas o kung arin man na partido political.
Masakit man pano paniwaraan kan sisay man na votante o politico na an nag-nominate kan mga soboot miembros nin Lakas saro palan na independiente o minasumpa pa sanang miembro kan partido ni PBBM.
Sabi ngani, pana-panahon sana ini, weder-weder lang, dae na baleng sala an pinun-an o caya bubuwa an pagkamiembro sa partido, basta pag-abot sa sesyon, saro sana an tutubodon, he! he! he!
Dati na ining gibo kan mga partido political sa Pilipines an magcaigua nin instant member, caya bako nang kananari na sagcod sa ngonian, aarogon kan mga politicong tahodan o masqui an mga soboot bakong politico.
Senyal man sana ini na an party system sa presenteng bersyon nin demokrasya sa Pilipinas daeng halaga, bagui man sanang trapo nin lideres sa kusina nin Malacanang.
*****
Igua na palan nin desisyon an Korte Suprema na an bako daang marinas camogtacan kan relasyon sa harong nin mag-agom puede nang magin rason para sa legal separation.
Sa pinaluwas na desisyon, tinugotan kan mga juez an petisyon nin sarong lalaki laban sa saiyang agom, na soboot kinaputan an cuarta kan familia, dae na nagtao nin asistencia pinansyal minsan pambayad sa pampahugkot nin tingo, y pinangosip pa sa publico na dapat nang putolon an ikinabuhay niya ta dae na sinda gaubay.
Ini daa inaapod na “grossly abusive conduct” sa irarom kan Family Code y puedeng magin basehan para sa legal separation, na an gustong sabihon puedeng magburagan an mag-agom alagad dae nawawaran nin bisa ang pagka-inagoman.
Caya inaapodan an sisay man na posibleng awat nang tios ning moda, panghimag, pitik sa taringa, pagbawal magluwas asin iba pa na dagos na magdalagan sa pinakaharaning abogado.
Alagad, magpasiguro na tabi nin pambayad sa huruhalawig na mga bista sa Korte ta kung dae man sana, bitbiton an cruz asin halaton an katapusan, he! he! he!
*****
Naiskandalo an ibang mga mahilig sa Facebook kan mabasa an mga nagluwas na mga post kan tolong politico na anas gaako kan credito sa pagkawara kan walong oras na brownout sa Isla Maogma.
Sabi ni Gob Pata, kan Enero pa siya nagsurat sa Malacanang na tawan nin fondo an provincia para sa pambakal nin krudo na isuplay para mag-andar an mga genset sa Marinawa.
Sabi man ni Cong Yoloyo, awat na siyang hagad sa mga nanunungdan na tawan nin permanenteng solusyon an problema sa corriente, lalo na an pagkabit kan isla sa main grid sa ibong.
Para qui Cong Bong, siya daa an mas nakapadari ta kan maisihan niya na mapaso na an contrata sa EPSA 1, dagos niyang sinuratan an Malacanang pati na an DOE na dapat i-takeover kan gobyerno an dae na magamit na mga genset kan EPSA 1.
Sabi niya, adyan na an mga genset, dae na caipuhan magbitbit pa haring Maynilang kayganda y an caipuhan sana an Napocor an magpadalagan.
Sayang na dae nagbalon si DOE Sec. Sharon Garin nin lollypop tanganing tigsadan niya an tolong ini tanganing maghapon nin sopsop, he! he! he!
Natural an sa politico an mag-epal, lalo na sa FB….