Bagui nang Semana Santa kung hehelingon mo sana ang tinampo.

Kulang na an gabyaheng mga vehiculo, lalo na mga awto na magastos sa krudo y gasolina. Cadaclan mga traysikel o caya motorsiklo na bakong masyadong makunsumo.

Ang mga nagbakal nin e-bike, gulo-gulo ta dae sinda nangaipo mamakal sa gas station, slagad maabot man an panahon na maitaas man an presyo nin corriente.

Ngonian na nagdagdag nin bayad sa cargo an RSL, caipuhan man na bawion kan mga dealer nin gulay y iba pang mga pagkaon na hari sa Maynilang kayganda an dagdag na bayad sa trak asin pangarga.

Mahalangkaw man an presyo nin bakalon sa saod y mga groceria, lalo na mga gulay, manok, bagas, hotdog, delata, sogoc, asin iba pa.

Ang pandesal ngani garesiko na daa, saday pa sa komokomo nin omboy sa magkaperang panaderia.

Masabay man an sila, ta dae man makalawod an mga parasira kung dae gagasolinahan ang bangkang de motor.

Pag-abot kan panahon na puro na mahal an bakalon, talagang tiripidan na ini.

Imbes na duwang ulam cada caon, saro na sana, gulay pa. An ipatinti kung banggui, solar light na pigcharge sa aldaw.

Minsan maripot ngonian na panahon, matios ta magamit nin magastos kalayo o corriente para makainit nin tubig.

Bawal na ngona an aircon, pasensya sa electric fan o caya duman sa balkon magkaturog.

An dae sana siguro papalsokon kan familia an internet, ta maribong an payo nin gabos, he! he! he!

*****

Milquinientos na daa an pamasahe sa aircon bus ngonian.

Kung sa ngonian, siete hanggan ocho mil pesos an pigasingil kan Cebu Pacific sa pagsakay sa eroplano, tibaad abuton na ini nin nueve hanggan diez mil kung saro o duwang semana na sana malarga ka na.

Dahil caini, baad magbawas an mga mabakasyon sa Isla Maogma ngonian na Semana Santa, cabale na itong mga turista.

An mga maimo dae mamroblema, pero itong mga tios man y nakabiyahe sana kung gatipon nin cuarta sa pirang bulan, saying an gagastoson na labing diez mil sa pagparibod.

*****

Nasaroan na naman ni Gob Pata si Cong Yoloyo.

Magiromdoman na kang Viernes sa aratubangan nin DPWH y mga oficiales nin recipienteng barangay, nag-anuncio an gatocaw na congresista na iguang maluwas na good news sa DENR manongod sa mga inanod y natumbang kahoy kang bagyong Uwan.

Kang Lunes, igua nang bareta an gobernador na nakakua na siya nin authority sa DENR sa pagkua kan mga kahoy na ini kan LGU.

Ta bako man daa siyang credit grabber o paraagaw nin credito, dae na sana siguro maribok an amo sa Batalay House of Representatives, he! he! he!

Mas nakalamang talaga sa kamas-kamas an saday, he! he! he!

*****

Makalibre pa an atorning administrador sa akusasyon na ginamit niya an carruaje nin municipio para maki-derby diyan sa coliseum ni Don Poroy, tabangan nin Diyos!

Dae man siya nalitrato na gamit an pickup o sakay kan vehiculo na an plaka ngani bako pang pula an numero y letra.

Alagad cierto daang pagsadiri ini kan municipio ta duman ngani daa nakaparada.

Noarin daw ini tatatakan nin “For Official Abuse Also” ning municipio?