Mamundo an cadaclan na taga-Isla Maogma sa padagos na patutsadahan kan lambang lado sa isyu kan Quarta Relief Fund.

Kan Simba, binalewala kan junta provincial an pag-veto ni Gob Azanza kan QRF ordinance.

Caya dae na sigurong mapuntahan an gobernadora kundi mag-file nin kaso sa korte tanganing maresolberan an isyu.

An problema, dae mapakinabangan kan mga labing treinta mil na familia na navictima ni Uwan an cuartang cotana para sa saenda ngonian na panahon na padagos an saendang pagtios.

An masakit pa caini, dae maringwan kan mga votanteng ini an nangyayaring caribocan sa capitolyo y an sisay man na invuelto masapar nin balos sa 2028.

*****

Segun sa sarong abogadong tahodan, sala an Sangguniang Panlalawigan sa isyu kan QRF.

An caipuhan man sanang ipasar kan SP simpleng resolusyon na aprobaran an hagad kan PDRRM Council na gamiton an fondo para sa madarian na tabang sa mga victima nin bagyo.

Dai puedeng iguang mga kondisyon ta segun sa lay, an poder nasa PDRRMC kung saen o pano gamiton an QRF

Harimbawa man na makaabot sa juez an isyung ini, daculang kasusupgan kung madaog an bide gobernador y honorableng bocal na mga matagas an arimantac, segun sa saiya.

*****

Parareho man pan-ong mga falta rason an cada lado.

An gobernador daa, an gusto buy-one-take-all, mantang an mga bocal buy-one-take-one, he! he! he!

Tolo daa an hagad kan Pata: enot, harion sa comitiva nin appropriation y infrastructure sinda PBM Bani y PBM Arnel; icaduwa, ipasar an QRF resolution; y, icatolo, oyonan an appointment kan tolong amo sa capitolyo.

Sa tolong ini, an QRF an daing kuwestiyon ta claradong an PDRRM Council an maboot kung pano gamiton an fondo.

Masakit harion an duwang PBM sa pagiging chairman kan saendang comitiva ta lo Mismong an gobernadora an naghagad caini sa SP kan Hulyo pa sana. Daeng ibang rason kungi an pagkontra kan mga dating kaalyado,

Mas masakit pa an camogtacan mga piniling mga amo sa PEO, HRMO y GSO.

Sa magiging provincial engineer, bakong masyado ta sa paghiling kan mga nacaisi, passado.

An kinahang sa pagiging Human Resource Management Officer dae man daang magcacanigong experience sa HRM.

Magpoon daa kan makapasar ini sa bar kan 2022, an naging trabaho partner sa law office ni atorni Tamayo y Posoy y contractual propesor sa CatSU,.

Ni dae daa ining training sa HRM ta an nakalista sana orientation sa procurement law kan Hulyo y an taon-taon na Mandatory Continuing Legal Education na pigapasunod kan Corte Suprema.

Sa parte kan magiging supply officer, an dae gusto kan SP iyo na pinagrecomendar na kan Bureau of Local Government Finance (BLGF) sa gobernadora kan Hulyo 2025 na an aplicante ireklamo nin kaso administratibo dahil sa dae daa nadepositong koleksyon na P1.6 milion y pagfalsipicar nin official receipts.

Sagcod sa ngonian, dae pa daang aksyon an gobernador sa hagad kan BLGF na kasohan an aplicante, na iyo pa naman an chairman sa Bids & Awards Committee.

An hagad kan SP fondo man sana, kung aanhon, batid na daa an gabos, he! he! he!

Sala man daa na an oficina sana ni gobernadora an solamenteng makinabang sa mga mejoras y deligencias posibles sa masunod na duwang taon, he! he! he!

*****

Hababa man cotana an ruta nin parada sa kaaldawan nin Virac, alagad mas halawig na an pagpaayos sa beauty parlor.

Sa sobra daang amay, karaturog pa an cadaclan na opisyal nin LGU caya tolo sana an aduman sa entablado—an bise mayor buda duwang consejal.

Tanganing halaton an ibang kagawad, sunod-sunod an alto kan parada, minsan bako man putol, daog pa an prusisyon, he! he! he!

Sa otro, ibalik sa dati an oras pati an ruta.