Base sa mga nagluwas na desisyon kan RTC sa mga protesta kan mga naderota kan Mayo dose, toltol man an pagbasa kan makina sa mga minarkahan na balota nin mga votante.

Posibleng iyo man an magin resulta kan protesta duman sa Gatasang Pambansa. Mas mapabor pa ngani siguro sa mga tawo an anuman na desisyon kan House Ethics Committee oras na isang-at na an reclamo nin conflict of interest contra sa congtractor nin Isla Maogma.

Caya an mangyayari na ngonian, halawig na campanya para sa Mayo 2028 na eleksyon, he! he! he!

An mga nacatocaw sa puesto gigibohon an gabos, makimaherak sa hahagadan nin fondo, tutubison an cuarta nin gobyerno para sana iguang maipaheling sa enot nindang taon.

An mga tiningkal makanap man sa manlaenlaen na barangay tanganing magpaheling y dae maringwan kan mga dating constituentes.

An maanan kan mga votante, kung sinsero an mga ini sa saendang mga gawi, lalo na itong mga binotohan para malinigan an local na gobyerno.

Tibaad sagin-sagin man sana an mga diputadong ini, ung rinas dangogon an mga panuga, alagad nangawkaw man sa kaban nin mga contratista, quarry permittee, supplier y mga operator nin illegal na sugal.

Bahala na an tawo mag-atid-atid kung arin saenda an hababa an sungay.

*****

Dinakop palan nin mga pulis an dating alcalde nin Calolbon, si atorni Leo “Nonong” Mendoza kang Lunes por sobre sa kasong graft and corruption.

Nagsuko man daa ining matoninong matapos ipresentar ni Maj. Francis Tabo I an mandamiento de aresto na inisyu ni honorable Juez Ritche Reyes Regala.

Dagos man nakapyansa nin noventa mil pesos an abogado para sa saiyang paglaya habang dinadadangog an kaso sa RTC Branch 43.

Segun sa mga nacaisi, naghagad daa nin news blackout an mga nanunungdan alagad masakit man itago an mga arog caining balita.

Kaidtong panahon na an media sa Isla Maogma duwa o tolo sana, tibaad puede pa.

Ngonian na panahon nin social media, an gabos na ciudadano puro na reporter, vlogger y komentarista.

Lo mismong an gobernador dae na ngani nakihuronhoron sa media kundi siya na mismo an gapaluwas kan saiyang tataramon sa Facebook.

Sa mga periodista, taga-radio o vlogger, manguntinwar ka pa, pacaonon mo pa y tibaad magduhor ka pa nin kung ano, mantang an pa-pisbuk libre, puede mo pang bawalan an mga kalaen magkomentaryo, he! he! he!

An hapot ngonian, kung igua pang mangyaring katibaadan sa palasyo nin SIV, puede pa daw itago nin Campo Camacho?

Baguing dae na kaya, lalo na ta sige sanang kalakalaga an politica.

An hanap pa naman nin mga tawo sa media y social media, itong mga gustong itago, he! he! he!

*****

Igua palan nin fund raising an Diocesis nin Virac para sa mga helako asin retiradong mga padi.

Ini sa paagui nin fun run sa Deciembre 13 diyan sa Virac.

Manlaenlaen na mga privadong establisimiento y mga tawong iguang pagmacolog sa mga alalay nin Kagurangnan sa daga an iniimbitaran mag-sponsor nin mga madalagan sa halagang cinco hanggan sitenta y cinco mil.

Puede daang itao an mga donasyon qui Reverendo Padre Eric Rojas diuan sa chancery.

Daeng anuncio kung puede magdonar an mga invuelto sa mga maanomalyang flood control, patinampo o school building projects kan DPWH para makabayad sa entrance fee qui San Pedro sa langit.

Sa mga kulang an hanapbuhay na mga Catolico, igua pang panahon para magtipon nin pambayad sa registration fee.

Tolo tabi an obheto kan proyectong ini: afuera sa tabang  sa mga pading iguang namate sa oro-aldaw na painom-inom nin Mompo, mabawasan pa an saimong timbang pati na kasal-an.