An mga mavisita sa oras nin trabaho sa mga local na gobyerno na bago na ang mga amo siguradong makagilomdom nin Semana Santa.
Igua daa diyan nin mga oficinang natural sinaralidahan an mga dating casual kan mga ward lider kan bagong amo.
An iba caini gaoromon-omon sa luwas o caya adyan sa laog, gatiripon sa sarong halabang lamesa, baguing mga disipulos sa Last Supper, he! he! he!
Awat na ining helang kan satong gobyerno. Paglaog kan elegido, layas an mga casual minsan mga baratid na sa trabaho ta an mga ganador naman an matukaw.
Minsan pa goslab na an malaog y dae na maasahan sa trabaho, palaogon bilang bayad sa servicio sa campanya.
Caya an publico hurohalawigon sana an pisi kung makitransaksyon sa mga oficina sa capitolyo y municipio na bago na an administrasyon.
Pasensiyahan ngona an diit na abara ta gaadal pa man an mga bagong empleyado kung ano an talagang gigibohon ninda.
Kung dae mag-asenso an mga naglaog y nagroro an servicio publico, makabalos man kamo ta pakatapos nin duwa o tolong taon, puede niyo naman ipako sa krus an nakatukaw, he! he! he!
*****
Inaapodan an mga consejal y bocal na mahilig sa Jollibee: igua na naman kamong rason para magngalab-ngalab sa privilege hour.
Kung nahiling niyo sa social media an nagkapurutol na biga nin tulay na pigagibo diyan sa boulevard sa San Vicente, Virac, panahon nang tabugaon an nakalistang contratista dindi, an tunay na gapatrabaho, pati na an oficina ni DPWH Regional Director Virgilio Eduarte.
Segun sa mga nakaisi, naka-subcontract daa an P160 million na ultimong phase kan boulevard extension sa halagang otsenta milyones sana, o cabanga kan orihinal na fondo.
An gustong sabihon, panigoon sana an otsenta milyones, kaiba na an ganancia kan subcontractor, para sa tulay na ini.
Sabi ngani kan sarong contratista, an halo daa kan kongkreto sa proyectong ini mas hababa sa standard specification kan DPWH. Imbes na quinceng sako cada cubico, once sanang sako an pigagamit, maati pa an graba.
Caya dae magnari kung baguing ampaw an nabuhusan y nagkapurutol kan masagi nin backhoe.
Sabi pa, dae daa maaser anuman na prestressing sa biga ta maluya ngani an halo, iguang posibilidad na magbaratak ini.
Ano pa daw kung nakasalugar na ini sa tulay, binabawan nan in baldosa y pinaaguihan na nin mga trak, SUV, traysikel y motorsiklo?
Saro pa, an subcontractor daa iyo man an gapatrabaho sa pasemento diyan sa highway sa tahaw kan Catalagan y Cavinitan na masyado nang atrasado.
Sa laog nin tolong semana, binurungkal na an kahalabaan kan tinampo alagad an binuhusan sana dae ngani cuarenta metros an laba. An resulta, daculang abara sa mga vehiculo y pasahero.
Maluya man daa an halo kan kongkreto, ta an gamit sana pitong sakong semento cada cubico, imbes na onceng sako segun sa contrata.
Totoo siguro an osipon na kulang an cuarta kan subcontractor y dae nakabayad sa semento caya dae nakabuhos.
Magayon caini ipaapod an duwang contratista, an mga project engineer, pati an mga opisyales kan DPWH regional office sa pangengenotan ni RD Eduarte.
*****
Gana palan an gurang laban sa aqui, 79-27, sa PCL election.
Daog nin cinco mil sa bolsa, ay diez mil na palan, an cinco milyones na panuga.
Caya an matukaw na bag-ong bocal na representante nin mga consejal an tahodan na si Raffy Zuniega.
Mahalat naman an Capitolyo sa masunod na pirilian, sa Deciembre, sa mga capitan y SK chairman….