Pito palan na mga derotadong candidato an naghagad ning manomanong pagbilang kan mga balota kan nacaaguing eleksyon.

Nasabotan ta man siguro kung ngata iyo ini an gustong mangyari ni Princess Vanessa Rodriguez, ta walo man sana an lamang saiya ni alcalde Johnny Rodulfo duman sa Bato.

Massive fraud o daculang darayaan daa an nangyari sa banwaan na ini, alagad kung siring an nangyari, kadududa man an kapangganahan kan ama ni Vanessa, na nakakua nin mahigit nueve mil na voto.

Halos parareho man an rason na iprinesentar ninda Bise Gob Boss Te, Gob Boboy, an aqui niyang si Chino, an alcalde nin Calolbon asin Pandan na sinawsawan kan kalaban, asin saro pang consejal sa Viga.

Base sa pag-atid-atid kan COMELEC asin PNP, nagi man na matoninong y malinig an eleksyon kan Mayo dose sa Isla Maogma.

Afuera duman sa drama sa Virac na soboot congresista an director, dae man nin naheling na ibang insidente na nakaafectar sa resulta kan votohan.

An hapot ngonian kan mga tawo: igua daw nin camogtacan an mga petisyon nin mga derotadong candidato?

*****

Sabi daa kan mga ganador, na obligadong simbagon an petisyon kan saendang mga kalaban, dae man nin dayaan y masque ngani sinda nabawasan man nin voto kan maagahon nin bilangan.

Segun sa mga mahilig sa politica, saro man sana an tuyo kan mga reclamador: an maisihan kung totoo man talaga an ginatos or rinibong undervotes o mga dae pagvoto kan mga votante sa manlaenlaen na puesto.

Saro pa, gustong testingon kung totoo man nanggad na iguang maniobra sa mga Automated Counting Machine (ACM), an maquinang ginamit sa pag-apreciar o pagbilang kan minarkahan na balota.

Segun sa mga huringhuding, igua daang mga calag na nag-ofrecir na sigurohon an panggana kan mabayad na mga candidato sa halagang cuarenta milyones.

Kung iguang nagsubad, dae ta isi.

Kung harimbawang totoo ini, maluwas an sa pagbilang na manomano oras na tugotan kan Korte.

Bako man gabos bibilangon hanggan matapos ta veinte porciento man sana kan mga presinto an eenoton.

Kung harimbawang iguang makuang evidencia nin salang pagbasa kan ACM, posibleng mabag-o an resulta y an daog an matukaw.

Alagad kung daeng maheling na maniobra, caipuhan nang akoon kan mga talunan na habo saenda an mga tawo.

*****

*****

Nangantiyaw na an mga alipores nin mga ganador na natunaw na an karera sa politica kan saendang mga kalaban.

Luway-luway sana mga nonoy ta harayo pa an 2028, dae magpare-enot-enot sa mangyayari.

Pero cierto man na tibaad dae na makabangon an nadaog sa magcapirang banwaan, lalo na an kinarigos sa rinagang tanglad, he! he! he!

An mga Cua, dae pa man tapos sa politica. Iyo posibleng magpahingalo na an gobernador alagad dacula an posibilidad na mapadagos pa si Boss Te sa maabot na panahon.

An gabos, siyempre, madepende sa gigibohon kan mga matukaw.

Kung marinas an resulta, magana pa sinda alagad kung maluya, adios patria adorada.

*****

Habang igua pang tada an regalong naresibe sa mga Santa Claus kan Mayo dose, mag-enjoy ngona an gabos na votante sa masiram na pagcaon, bag-ong Durabox, muebles o telebisyon.

An hurit sana, magtada man nin diit ta tibaad sa mga maabot na bulan, makamati nin daendata y mangaipo nin pambakal nin bolong, he! he! he!

Tibaad masakitan kamo magsolicit, he! he! he!