Dae pa ngani nakasumpa ang mga matukaw na amo sa mga local na gobyerno, igua na sindang mga alipores na gapatakot na sisipaon an mga dae oyon na mga permanenteng empleyado.

Segun sa mga huringhuding, rerepasohon daa an mga ginibong appointment kan naderotang gobernador sa capitolyo kan mga nacaaguing taon.

Kung ano an masunod na mangyayari, maisihan na sana kan publico (cabali an mga macuapo ni Nestor).

Natural, an mga ginatos na mga job order sa mga LGU, siguradong dae nang trabaho pag abot kan saendang bag-ong amo.

Masuerte an mga casual na naelegir otro an mga alcalde ta padagos an saendang servicio.

An mga traffic aide, janitor, clerk, guardia civil asin iba pang mga bakong permanente sasaralidahan na sa capitolyo, Calolbon, Pandan, Bagamanoc, San Miguel y Virac, afuera na sana sa mga nagbaraliktad kan panahon nin eleksyon.

Sabi man daa kan matukaw na gobernador, dae man daa palayason an mga tunay na gatrabaho o caya importanteng gayo sa operasyon kan saendang agencia.

Sa provincia, hanggan kan fecha quince na sana daa an valdes kan mga job order.

Entonces, kung adyan pa sinda gatrabaho, atag na sana an saendang paglaog lalo na kung an saendang agencia mapilay kung dae sinda malaog.

Iyan an natural na consequencia kan pagtukal nin poder na dapat akoon y respetohon kan gabos.

*****

Sarong semana matapos an eleksyon kan Mayo dose, dae pa gatibwas an namakal nin Durabox, plastic y kung ano-ano sa tindahan nin Taiwanese sa Virac pati an mga nakaguda na an hanap mga appliances arog kan electric fan, cellphone y telebisyon, mga sofa, gamit sa kusina, kama, asin iba pa.

Tiba-tiba an mga paraluto nin manok, ta sagcod sa ngonian, dae pa nasawa sa roasted asin fried chicken an mga familia nin votante.

Duman ngani daa sa McDo ni Tariman, caipuhan pang magpila sa luwas bago ka palaogon kan guardia.

Sa mercado (bako si Orly), kulang pa an gatinda nin sila ta diit pa sana an galawod na parabanwit.

Pati ngani an pigapabakal na latik sa aeropuerto sa SIV nakadamay ta dae nakagibo si Impling ta wara man an alalay na trabahador.

Pero tibaad bago pa man mag-abot an Simba, normal na an camogtacan kan gabos ta maubos man an inako kan mga votante sa mga politico.

*****

Segun sa mga nacaisi, masobra sa siete cientos cincuenta milyones pesos an binuhian kan mga daraculang politico na pambubod sa mga votantes kan Isla Maogma.

Dae pa dindi cabale an mananggatos, manincuenta, balde, sabon, shampoo, bolong asin noodles na pinanaltag kan mga candidato sa municipio asin junta provincial.

Dacula an efecto caini sa economia kan isla, pero mas dacul siempre an ganancia kan mga tindahan na rinusob kan mga maimo, lalo na an Taiwanese, Bazaar, VTC, Jollibee y McDo.

Mayad pa an mga Cua ta masqui papano, mabarik an parte kan saendang pangkurukay, he! he! he!

An mga naderotang dae nin negocio, lalo na itong pinangutang an ginastos, pirang bulan nin mapatago sa parasingil o caya mapilitan na magpabakal nin propiedad.

Caya sa mga masunod na bulan, maghorop-hprop na an mga ini kung mapadagos pa kan saendang karera sa politica sa 2028.

Kung sabagay, madari sana magtaya sa lotto, veinte pesos cada aldaw sa sarong numero,  siete mil tres cientos pesos man sana cada taon.

Kung manggana, mayad ta puedeng buhayon an gadan na ambisyon. Kund dae, mayad man ta diit sana an daog, he! he! he!

Sa mga ganador, igua kamong tolong taon para gamiton an sinubrian na poder. Magayon na magtoltol tanganing makaotro…