Sobra pang sarong bulan bago mag-eleksyon, nagpoon na magribot si Santa Claus sa Isla Maogma.

Ini an osipon sa magcapirang barangay na navisita kan mga carruaje hari sa North Pole.

An mga bitbit ogaring na mga regalo bakong mga kawata para sa mga aqui kundi mga manlaenlaen na gamit para sa mga kusinero, paralaba, mga karigoson y mga helangon na goslab na nangaipo nin bitamina o bolong, he! he! he!

Igua man daang gadohor nin papel na puedeng ipanukal sa tindahan, alagad baad pakalag man sana. Ta kung mapoon manaltag an Santa Claus ngonian, matentaran an mga pigregalohan na ipamakal na an papel. Maabot man an eleksyon, napunas na sa memorya an nagtao, he! he! he!

Alagad, tama man an tayming kan pagrecorida ni Santa Claus sa ngonian ta manaltag na man daa an Comelec sa mga harong-harong nin codigo sa cada votante.

An mga codigong ini, mga tugang kong mga gaabang nin regalo, makatabang ining golpi tanganing masigurong an mga matao nin matricula para sa pirilian sa Mayo dose dae maringwan pag-abot sa presinto.

An gabos daang votante macaresibe nin Voter’s Information Sheets, apat na pahinang papel kung saen nakalista an pangaran nin gabos na candidato sa pagka-senador, party list, congressman, gobernador, bise gobernador, bocal, alcalde, bise alcalde, y mga consejal sa distrito y municipio kung saen kamo mavoto.

Puede daa ining darahon sa laog mismo nin presinto para dae na kamo magbitbit nin mga sample ballot na italtag kan mga candidato.

Harimbawang makakua na kamo kan VIS, itago ini nin marinas tanganing dae mawara.

Kung mag-abot na si Santa Claus y maghubon nin regalo, iluwas an codigo y bilogan nan in tinta an magcacanigong pangaran ni Santa Claus, he! he! he!

An mga candidato na sadiring tawo o dae puedeng hagadan nin regalo, markahan nan in bitoon tanganing dae maringwan.

Harimbawang magsobra man sa dapat na numero an bilang kan mga nagregalo, bahala na kamo magpatoron nin lapis, basta prioridad an mga iguang markang bitoon, he! he! he!

*****

Sa ngonian na panahon, dapat halos cierto na an fondong caipuhan nin lambang candidato, lalo na an pangkurukay sa mga votante.

Alagad, kulang pa daa an ayudang narecibe kan cadaclan na gusto magsirve sa banwaan, caya kabado na kung an lantsa makalampas sa Tagongtong, he! he! he!

Iyo siguro ini an rason kung ngata hanggan sa ngonian, kulang pa an garibot na mga paribok sa mga barangay. Kung igua man, pirming kaiba nin mga candidato sa harong-harong na pangabrasa.

An gustong sabihon, ihunat ngona an presupuesto para sa pirang semana, ta tibaad maubusan nin panggasolina bago mag-abot an cabangan kan campanya.

Ta Semana Santa na, magayon na maghorop-horop na an mga candidato, lalo na itong mga hababaw an bolsa, kung ano an marinas na gibohon sa masunod na semana, atras o abante.

Afuera sa mga magcapirang one-on-one na mga laban na dae pang rinaw kung sisay an magana, nasa isip na kan cadaclan na votante kung sisay an masumpa sa Hunio treinta.

Su mga dae nakabali sa mga ciertong ganador, duwa man sana an puedeng gibohon: magpadagos hanggan maderota, bako sana sa voto kundi sa bolsa, o magluway-luway nang magpahingalo.

Natural su mga pinakandidato na dae man manggagana, mapadagos ta paka-eleksyon an kubra, he! he! he!

An mga ini iyo itong sige sana an campanya, alagad an hagad man sana masqui sarong voto cada harong, he! he! he! An intension sana mabawasan ang voto kan kalaban na bako niyang kaalyado.

An problema sana, kung madaog man an nagpakandidato, makatao pa daw nin pambayad?

Sayang man an kamas-kamas, an pagpakyut sa social media kung dae makadeligencia, he! he! he

*****

Magayon man an nangyaring aratubangan diyan sa kahadean nin dating halangkaw na opisyal na ngonian gusto magtukaw sa capitolyo.

An problema sana, dae man nakumpleto an mga bida pati kontrabida. Magcapira sanang mga bocal an nag-aparecer sa tribuna nin mga tawong cadaclan mavoto sa candidatong mahilig sa magayon na drowing.

Iyo man siguro an suspetsa kan mga ausenteng aspirante na dae na inako an imbitasyon kan comitiva, ta tibaad handa na an panggisa sa saenda, he! he! he!