Duman na naman palan sa DPWH regional office pigapabidding an mga proyecto nin Isla Maogma na cotana an oficina ni DE Simon Arias an maimplementar.
Ini daa sa kapagbootan kan tunay na district engineer duman sa Batalay House of Representatives, na dae pa naori-an sa nangyaring pabidding sa SIV na an nanggana kalaban niyang local na contratista.
Segun sa mga osipon, dae daa kayang imponeran ni DE Arias an saiyang mga tawo sa SIV na magbalga sa Republic Act 9184 para sana paganahon an mga napiling contratista kan gatingog na congresista.
An hapot, pano nadadaog sa public bidding sa regional office an mga taga-Catanduanes na contractor?
Enot, kaipuhan pang magbaryo nin dagat, matios nin lula y magastos pa para sa pag-estar sa hotel, dati nang lugi dae pa ngani gapoon.
Icaduwa, sabi kan mga nakaisi, dati nang gibo kan BAC ni DPWH Regional Director Virgilio Eduarte na pasakitan an mga taga-islang contratista.
Dadagdagan kaini an mga equipaje na kaipuhan sa proyecto minsan minimum man sana an kaipuhan.
Harimbawa, kung simpleng patinampo man sana, hahagadan an bidder na magpresentar nin limang dumptruck, duwang batching plant, duwang concrete mixer asin iba pa masque duwang track, sarong batching plant y sarong mixer man sana an kaipuhan.
Diyan ngani daa sa ipabidding na tulay sa Sagrada sa Bagamanoc, an hinagad na crane kan BAC sa regional office duwang 75-tonner, imbes na duwa sanang tig-50 tonner. Natural, diskwalipikado an mabaling local na contratista kung dae kang ikapresentar.
Caya sa mga masunod naman na bulan, lalo na kung magpinatal naman an mga votante nin Isla Maogma y mabudol naman kan Batalay House of Representatives, padagos an pagtios kan mga trabahador sa construction ta dae man sinda palaogon kan mga contratistang taga-ibong na paborito ni Madam.
Lalo man na daeng kita an mga local na hardware ta dae man mamakal nin gamit an mg aini.
Lugi man an BIR sa San Isidro Village ta an buwis kan ganador na contratista duman ibayad sa Legazpi City.
Caya padagos an kaogmahan ni Cong Yoloyo, padagos man na pupugaon kan mga revenue collection officer an mga saraday na negosyo sa Isla Maogma para sana mapanoan an nawarang buwis, pwe!
*****
Skyflakes palan o caya pandesal an panartag ni Cong Yoloyo sa paghaus-to-haus caini sa mga barangay, pero daeng panulak kaya bahala an gakaon maghanap nin inumon.
Ini dae pa kabali an aquinientos na bayad sa sisay man na opisyales nin barangay na masabay sa grupo sa pagribot.
Kaya ngani daa nagka-ideya an sarong paratienda nin ice cream sa Virac na magsunod sa pagribot kan gatocaw na congresista, para soboot bayadan na sana kan taga-Batalay an enterong paninda para sa mga gasurunod na mga votante.
Alagad binugaw da aini, ta madagdagan pa nin bayadan an grupo ni Yoloyo, he! he! he!
An gustong sabihan, tantiyado na y dae dapat magsobra sa budget an congresistang taga-Maripipi, Biliran, ta kung magsobra, manghimag si Madam, he! he! he!
*****
Kahelak man daa ni Cong Yoloyo ta ginirisi ang karatula diyan sa duwang entrada kan Moonwalk.
Alagad baguing gibo man sana ini kan sainyang campo ta kung sa kalaban, dae na cotana tinada an pandok kan gatocaw na congressman.
An dapat kahelakan an mga motorista asin publico na iyo an gagamit kan Moonwalk road, na an baldose trinabaho nin ERR Construction apat na taon na an nacaagui. Dae lamang nakaantos nin eleksyon, barakbak na an semento….