Igua na daang Bids and Awards Committee an DPWH Catanduanes District Engineering Office.

Segun sa mga chismoso diyan sa SIV, nag-abot na palan si DE San Simon kan nacaaguing semana matapos an magcapirang aldaw na ausente sa trabaho.

Nagsumitir daa ini nin listahan kan mga magiging miembros kan BAC duman sa oficina kan tunay na DE diyan sa Batalay House of Representatives alagad dae ini inaprobaran.

Aduman daa caya sa listahan an duwang kalaban kan congresistang gatindog, an ingenierong nangahas kuwestiyonon an orden kan DPWH regional director na siya ibaryo sa ibong, pati an saro man na amo nin departamento na singaki kan dating district engineer,

Caya napilitan si DE San Simon na salidahan an duwang suwail nin saiyang mga parasunod. Kabali daa sa BAC an dating miembro nin BAC na tinarikodan an trabaho kan nacaaguing taon matapos kuwestiyonon nin contratista an desisyon kan BAC.

Nakumbinse daa ining magbalik sa BAC ta pinanugaan na siya ikahang bilang amo sa saro sa duwang madeligenciang oficina oras na magretiro an amo caini.

Sa ngonian, dae pang noticia kung ano na an nahaman kan BAC, lalo na ta sa sisente y ochong proyecto para sa 2025, lima pa sana an naibidding kan SIV, an apat na caini dae pang award ta an mga kalaban kan gatindog na congresista an nanggana.

Hanggan kan nacaaguing semana, dae pa nag-aparecer sa sesyon kan junta provincial an wara-warang district engineer, bagay na nakapahayblad qui PBM Balidoy.

Kung dae pa magpaheling ngonian na semana si San Simon, tibaad ideclarar na ining personang daeng data kan mga honorableng bocal.

*****

Ipadagos ta an satong istorya sa magiging kapalaran kan satong mga candidato ngonian na Year of the Snake.

Sa limang gadalagan sa pagka-congressman (dae kabali an gatingod na congresista ta bako man ining elegido kundi kapot sa riog an nacatocaw), an duwa parehong Tigre.

Si PBM Jan Alberto minundag sa Quezon City kan Enero 20, 1999 mantang si alcalde Sammy Laynes uya sa Virac kan Sept. 14, 1962.

Sabi kan feng shui expert, an mga Tigre (2022, 2010, 1998, 1986, 1974, 1962, 1950) na naghengoha y nagtrabaho nin marinas kan mga nacaaguing taon tatawan nin premyo ngonian na 2025.

An saendang marinas na trabaho mimidbidon nin tawo y tatawan sinda nin dacul na oportunidad sa saendang karera.

Ta malang pareho sindang nangarap na tucalan an representante nin Isla Maogma sa Gatasang Pambansa, maghapot na sana tabi sa Sangguniang Panlalawigan y mga parasolocit na gapila diyan oro-aldaw kung inano man an naginibo si PBM Jan kan nacaaguing duwa y may cabangang taon: kung ini presente sa mga sesyon y miting nin mga comitiva, kung ano man an naipasar na resolusyon o ordinansa, y kung madari ining hagadan nin tabang diyan sa oficina.

Puede man hapoton an joven pang bocal kung seryoso siyang manggana kung an hagad niya sa mga votante sarong voto sana cada harong.

Qui Samuel dae nang dacul na hapot ta naheling an sainyang nahaman bilang alcalde nin Virac, na nanggana nin ondra sa Seal of Good Local Governance kan 2024.

An aqui man kan derotadong congresista na si Manoy Hec, an negocianteng si Cedric, minundag kan Oct. 19, 1996 sa Makati City, duman sa Makati Med siguro, y siya sarong kino sa Chinese calendar.

Segun sa pungsoy, maasenso an karera kan mga Rat (2020, 2008, 1996, 1984, 1972, 1960, 1948) minsan grabe an kumpetisyon. Tibaad iyo na ini an pamanahan kan mga dagang binakal kan saiyang ama sa Isla Maogma y bilang manedyer, bubuhayon na an istasyon nin radyo diyan sa Bigaa.

Sa maabot na mga taon, magayon na mag-aplay ini bilang manedyer nin Dificelco tanganing sa cada brownout, ikurahaw man nin mga consumidor an saiyang ngaran siring qui Hector, he! he! he!

Naubusan na kita nin espasyo. Ipadagos ta pag-silip sa bolang kristal nin China sa masunod na semana