Patanid sa mga mahilig magsupsop ning asô nin sigarilyo.

Segun sa bareta kan nacaaguing semana, an cada sigarilyo daang pigabutobot nakabawas nin veinte minutos sa life expectancy o an posibleng kahalabaan kan buhay nin sarong tawo.

Ini daa base sa riserts duman sa UK o Inglatera.

Caya kung ika nakaubos nin sampulong sigarilyo cada aldaw, dos cientos minutos o tolong oras y veinte minutos an nabawas sa magiging buhay mo sa kinaban cada aldaw.

Kung sa sarong taon, an bawas sa life span nin parasigarilyo cincuentang aldaw.

Sa sampulong taon nin butobot, quinientos na aldaw o sarong taon, apat na bulan y veinteng aldaw.

Base sa pag-aadal, an life span nin mga tawo daang nagsigarilyo sa enterong buhay ninda hababa nin sampulong taon kumpara sa mga dae nagsigarilyo.

Ngonian, dae ta man pigasabihan an mga adik sa sigarilyo na magtonong na. Ini patanid sana na habang amay pa, maghulog na sa St. Peter para sa kahon y pantiyon, magburo-biyahe na sa ibang lugar kung iguang imo, kaibahan siyempre an mahal sa buhay.

Kung gaapura man, dagdagan pa an sigarilyo nin inom, habhab, sugal, babayi asin iba pang bisyo. Dakula daa an laguerta y mansiyon ni Satanas, pirming iguang bakante, he! he! he!

*****

Nagpaluwas na palan nin abiso si Santo Papa Francisco na an sermon nin mga padi dapat walo hanggan diyes minutos sana.

Ini daa base sa pag-aadal na pakalampas nin sampulong minuto, an atensyon nin tawo aduman na sa kisame, sa lanob, sa luwas, o caya mapiyong na sanang basing.

An problema sana caini, igua pang mga padi na daing tig-an an pataratara sa pulpit, an iba ngani nakaabot nin sarong oras.

Dae man puedeng pugulan si padre, lalo na kung minakainiti an discurso sa Biblia y mga salang gawe nin paratubod.

Magayon na paghoronan kan mga cardinal, obispo y kapadean kung ano an dapat gibohon.

Dae man puedeng magdagdag nin lay minister na madara nin karatulang “time is up” na iitaas sa atubangan kan padi pag-abot nin diyes minutos.

Kung maoho an diocesis, patanogon an bagting siring sa gibo nin Comelec sa candidates’ forum, he! he! he!

*****

Igua na naman palan nin gigibohon na milagro an solamenteng santo sa DPWH diyan sa SIV.

Ini matapos na orderan daa an mga miembros nin BAC na bag-ohon an ginibo nindang motion for reconsideration pabor sa contratistang enot nang pig-disqualify sa duwang contrata.

Caya nagdimitir na sana sa puesto an vice chairman ta naospital sa kaiisip kan consequencia nin salang gibo.

Ngoniand daa, an plano duman na naman idara sa regional office an gabos na proyectong dae pa na-bidding pati na an mga supply contracts ta dae daang BAC.

Daeng BAC ta dae man daa nagsumitir nin bag-ong set nin miembros sa central office segun sa reglamento duwang bulan bago mag-expire an termino kan BAC kan Deciembre.

Saro pa, sikat palan daa ngonian an DPWH Catanduanes DEO sa ibong ta naging kapurit sa paggamit nin maintenance funds.

Caya an gabos na biyaheros pati na mga cagsadiri nin awto y vehiculo dae magnari kung dacul ngonian an lubak sa kalsada nasyonal pati an mga gilid puro na awot.

An gustong sabihon dae nang pigaribo an mga ingeniero y caminero diyan sa DPWH ta kulang man an proyectong piga-implementar y dae man gabakal nin gamit para sa road maintenance.

Magpasalamat tabi an gabos na ciudadano sa Batalay House of Representatives ta iyo an kagboot kang mga bagay na ini sa DPWH na sa huring bilang anom na an sinipang amo sa laog nin duwang taon…