Sa enot na aldaw nin 2025, magpasalamat kita sa Kagurangnan ta nalampasan ta an nacaaguing taon. Maghagad naman kita nin tabang na sa maribok na taon na ini, lalo na sa primerong anom na bulan, puro sana ngalab-ngalab an madangog ta sa mga kandidato, bobowa man o totoo, basta bakong putok nin badil o granada.

*****

Ngonian na tapos na an Deciembre, matipon na nin pambubod an mga ambisyosong makatocaw sa puesto kan saendang mga kalaban na elegido.

An hararom an bolsa pati na an iguang caja de hierro sa harong, iguang ventaje. An mangutang pa sana, luway-luwayan na pariwanagan kan mangyayari oras na madiskaril an tren o caya maglubog an baroto na dae pa nakaantos sa Tagongtong.

Sayang an saendang kamas-kamas pati an pagtapsik nin riwoy sa tribuna kung sa huring aldaw, dae kang itapal na dahon hari sa Bangko Sentral sa angog na pampaguilomdom pag-abot sa presinto, he! he! he!

*****

Iguang mga hula an mga espiritista sa Quiapo kung ano ang mangyayari ngonian na taon.

Matapos na daa an giyera sa Ukraine caya posibleng magbaba na an presyo ning krudo, gasolina y gas sa Isla Maogma.

Tibaad daa talagang magpareho na an presyo kan duwang supplier, bako sanang sa karatula kundi sa pagbayad.

Sabi ngani nin sarong drayber nin van, mas nakalamang an nasa silangan kaysa subsuban, ta an sanribo iguang dagdag na sarong litro kumpara sa discuento sana.

Lalo daang magiging dakula an efecto kan AI sa kinab-an. Ta cadaclan kan mga estudiante ngonian, igua nang mge smartphone, puede na maka-download nin ChatGPT y dae na mangaipo nin tabang nin magurang sa pagsimbag sa mga assignment sa escuelahan.

Pabor man ini sa mga laraking naagahan sa luwas ta makaresearch nin katutubod na rason sa agom, he! he! he!

Igua pa daang maabot na pandemya na mas malala pa sa COVID-19. Kung mangyari ini, balik naman kita sa quarantine y daeng makabaryong tawo hari sa ibong, puro sana kargamento.

An mga pagkaon na iorder sa restawran o turo-turo, mamahal nin diit ta an madeliber na mga drone y an bayad sa Gcash o bank-to-bank. Dae man nin problema kung dae magamit an cuarta ta anas na ini plastic sa 2025, pati an sinsilyo, he! he! he!

Ta makulong na naman an mga tawo, mahalangkaw man an bayad sa PLDT ta puro na sana internet an komunikasyon kan gabos, pati pangampanya sa votante.

Magcacaigua man daa nin paghalawig nin buhay nin tawo, pero dae cabale an mga gaarapura lalo na an mga parainom, parasigarilyo, nanguubay nin bako niyang agom, mga mahilig sa nene asin fafa.

Tibaad daa mangyari na ang byahe nin tawo sa ibang planeta. An mga bilyonaryo sa Saturn y Jupiter malamyerda nin anom na bulan, an kulang an imo sa Venus na mainit-init, praktis sa impiyerno.

Tanganing dae na magsurusuan sa carcel, an mga sentenciado nin habambuhay duman na sa bulan idara.

Lalo man madakol an plastic sa dagat sa pasabod-sabod nin patos nin shampoo o chichiria na tingi-tingi. Madakol man an mga pagkaon na an laog microplastic, lalo na an sila pati carne. Caya dai na magngalas kung pag-abot nin Deciembre 2025, cadaclan na tawo puro na plastic bako sana sa ugali, he! he! he!

*****

An possible daang mangyari sa 2025 iyo an paglayas nin mga amo diyan sa duwang agencia sa gobyerno sa SIV, na parehong kolektor nin saendang mga tunay na amo.

An saro daa kulang an buhok, kulang man an tinaltag kan Krismas ta kulang man an deligencia.

An saro nasobrahan nin kolekta caya tios an mga negociante daog pa an naholdap. Hulaan nyo daw….