Cadaclan daa kan mga candidato pigrespeto man an pag-guiromdom kan saendang kahimanwa kan saendang mga gadan.

Contento na sindang maheling na gavisita sa mga pantiyon, nakisumaro sa saendang mga familia kan defuntorum.

Alagad igua man daang sinamantala an pagkakataon na mas lalong maglataw an saendang mga pandok asin pangaran.

Duman sa camposanto nin Bato, sarong candidato para kagawad an nagpakaon nin lugaw sa mga gavisita. Inda kung nagtuwang man ining ikahang sa mga basurahan an mga kinaonan kan mga nakihagad.

An iba, nakabadong pula asin ibang macolor na gubing, nagpasad-pasad sa mga lulubngan, abrasa dindi, pakihampang duman, tibaad lamang makakua nin voto, he! he! he!

Sa otro kaan, igua nang manaltag nin kandila na iguang tatak sa gilid o caya burak na iguang tarheta nin politico, baguing so mga koronang pigadara sa mga gadan, he! he! he!

*****

Paapudon daa kan consejo municipal nin Calolbon an tunay na contratista kan sarong road reblocking project diyan sa may camposanto kan banwaan.

Segun sa mga osipon, an proyecto daang ini na piga-implementar kan DPWH pinun-an bago pa man nag-agui si Kristine.

An hagad daa cotana kan mga tawo, dae ngona pagtosangon an baldosa ta maagui pa an Defuntorum.

Alagad binakbak na kan tunay na contratista na soboot capital del baryo diyan sa población nin San Andres.

An problema, kulang man siguro an capital ni capitan caya an harang sana sa binakbak na tinampo iyo an inaapod na yellow tape. Daeng barikada, daeng ilaw kung banggui.

Sa laog sana nin sarong semana, lima na an motor na nagtuwad sa proyecto, segun sa mga chismoso.

An ikalima daa an nagolpi, parasa an pandok, didiit maputol an dila.

Adyan daa ngonian sa CDHI pigabolong, natahi pa sana an dila, isunod naman ayuson an panga na mangaipo nin titanium na gakahalaga nin cuatro cientos mil pesos.

Base sa taripa kan mga doktor sa tol-ang, an professional fee sa operasyon n aini kapareho sa presyo kan bakal, caya cuatro cientos mil pesos man.

Cierto nang harani o malampas sa sarong milyon an magastos kan pobreng motorista sa pagpabolong.

Hinagadan na daa nin tabang an gatindog na congresista, na iyo an nagtao kan proyecto qui capitan.

Alagad grabe daa an panayuma caini ta an solicitan daa iyo an capitan ta iyo an makinabang sa proyecto.

Daculang problema ini kan contratista na bako man, lalo na ta siguradong sisingilon pa siya nin diez y ochong porcientong SOP kan gatindog na congresista.

Sa ngonian daa, tinabinol na nin graba an toho sa kalsada pakatapos kan ultimong insidente.

Kung noarin ini pabuhusan kan contractor na bako man, dae ta isi, lalo na ta caipuhan niyang mag-aparecer sa hearing kan consejo municipal.

*****

Dakul nang mga kasong arog caini an nangyari sa Isla Maogma, bako man sana ngonian kundi sa termino pa nin mga nacaaguing congresista.

Natural na kung an contrata itao ninda sa mga bako man lehitimong contractor, lalo na mga politico, matipid ini ta caipuhan padakulaon an kukubrahon na ganancia.

Kung tinampo an proyecto, mas halangkaw an taripa kan congresista ta diit man sana an caipuhan na materyales –  baybay, graba, semento asin tubig.

Mas magayon kung flood control o seawall, ta an graba, baybay buda bato adyan na sa kataning, dae na mangaipo nin permit sa capitolyo kung daeng mabantay. Mas lalong halangkaw an SOP ni Cong, he! he! he!

Dae na baleng dugui an palaman kan dike o seawall ta dae man mahiling kan mga inspector nin DPWH (Departamento ng mga Proyektong Walang Halaga).

Bahala na an bagyo, baha o suoy an makadiskubre, pwe!