Igua naman palan nin ginibong milagro ang pinakahalangkaw na opisyal sa CatSU.
Segun sa osipon, nagpost palan ini sa saiyang social media account na nakaresibe siya nin fondo hari qui VP Sara para sa TUPAD, o itong fondo nin gobyerno na para ipangsuweldo sa mga taga-barangay na pigapalimpya sa tinampo.
Inda kung ngata pati an presidente nin unibersidad qualificado man mamili nin recipiente nin TUPAD o caya maging bida sa mga benepisyaryo, na an bagay na ini para man sana sa mga LGU o elegidong opisyal arog kan senador, congressman o gobernador.
Igua pa daang litrato an soboot orientation para sa mga maresibe kan TUPAD, alagad duman ginibo sa palasyo kan halangkaw na opisyal.
Igua nang nagreclamo sa DOLE regional office kung ngata tinugotan kan DOLE Catanduanes na an orientation sa TUPAD ginibo sa privadong harong, bako sa barangay hall.
Segun sa huringhuding, sinabi daa kan director kan DOLE na sala an ginibo ini caya pinaimbestigaran na an bagay na ini.
Grabe talagang paanos, he! he! he! Maayad-ayad pa si Yoloyo pati si Cong Bong ta sa plaza an orientation pati an payout…
*****
Nanaday palan daa an sarong opisyal nin CatSU duman sa meeting kan Board of Regents kan nacaaguing semana.
Ini daa kan sabihon kan chairperson na si Commissioner Ethel Agnes Valenzuela na sala an ginibo kan administrasyon, lalo na an acting board secretary, na pugulan asin abarahon an pagtukaw kan USC President.
Segun daa sa chairperson, dae daang poder an BOR para desisyonan an kwalipikasyon kan candidato sa student council, kundi an COMELEC sana.
Nagluwas man sa hororon na dae man daang orden an BOR na i-defer an oathtaking asin assumption ni Cortado kundi i-defer an diskusyon kan isyu ta dae man daang darang dokumento an halangkaw na opisyal nin CatSU para madesisyunan ini.
Entonces, daeng basaran an inisyung memorandum kan acting board secretary na dae puedeng mag-asumir si Cortado ta bakong sanctioned kan BOR an pagsumpa caini qui alcalde Samuel Laynes.
Dae man nin inaprubaran na resolusyon o masqui verbal approval an BOR kan ini magmiting duman sa Central Bicol State University of Agriculture.
An gustong sabihon, peke an memoramdum na ini.
An hapot: sisay an manimbagan kan kamarangmarangan na ini?
Segun sa mga chismoso, tolo daang tapos nin abogasya an posibleng bukodon kan agrabyado, duwang pasado buda sarong Janggang Diploma sana, he! he! he!
An masakit, kung negaran kan duwa y an marigot iyo an nagpirma sa memorandum….
*****
Magayon an labanan sa cadaclan na puesto sa masunod na eleksyon.
Sa congressman, an mga cabali daa sa punete iyo an incumbent na an mga proyecto pina-bidding sa ibong caya mga taga-ibong an nakinabang; alcalde na topnotcher sa board, joven na PBM na dae pa ngani nakatapos kan primerong termino sa puesto, y tibaad an wara-wara kan pandemic na dating congresista.
Sa gobernador, maheling kung sisay an mas halangkaw sa bise gobernador, an gaestar sa Disneyland y an retiradong heneral na dae nangaipo nin sunday.
Tolo man daa an masalpukan sa bise, an dating amo laban sa PBM na taga-Payo, babayi laban sa lalaki, sa diskarte ini magadaraogan.
Sa mga municipio, sa Bato an magabat an laban, ta talagang magabat daa an kalaban ni alcalde. Bako sana daang sa timbang nakalamang kundi sa gabat kan laog nin bolsa, he! he! he!
Diyan man sa Calolbon, mahagad nin panduwang termino an alcalde pero tibaad daa makasaripsip an saro sa duwang kalaban, an dating alcalde asin an bise mayor.
Sa Caramoran, baguing bako man delicado an camogtacan ni alcalde ta an karibal dati nang naderota y an saro dara sana an pangaran kan agom.
Ining sa Pandan an bantayan ta replay kan nacaaguing bakbakan, an maduwahan nin pagkapadungkal tibaad dae na makabuhat.
Sa Bagamanoc daa, mapurba an dating bise gobernador na makabalik sa municipio pero baging dae mapadaog an hadi ta nakaamot na daa sa puesto, he! he! he!
Kung gurano an maresibe kan mga votante sa Payo, depende na sa klase kan kalaban ni alcalde, he! he! he!
Sa Gigmoto, masqui magritad-ritad na si At-At, bahala na an kairiba mangampanya. Iyo man an mangyayari sa Baras ta dae man sigurong mangahas magtapok sa aqui nin congresista.
Mas magayon sa San Miguel, ta an bubutasan ni alcalde sa rueda iyo an aqui niya laban sa tahodan ma dinaog kan 2022.
Babaye laban sa duwang lalaki sa Virac, abogado kontra doctor konta gobernador, parapakilaban sa korte laban sa parabolong nin helang laban sa tahodan na politico, bahala na an banwaan magtimbang kung sisay an mas makatabang.