Igua na palan nin bag-ong amo an Human Resource & Administrative Service kan DPWH Catanduanes District Engineering Office.

Segun sa mga gangangang kimot sa San Isidro Village, an gabos palan na ipalaog na job order o casual na empleyado sa kahadean ni DE Simon Arias caipuhan ngona aprobaran duman sa Batalay House of Representatives bago pa man ini akoon sa oficina.

Iyo na daa ini an palakaw ngonian sa administrasyon kan DE na harani na maubusan nin buhok masque dae pigasabunotan.

Caidto daa, daeng pakialam an sisay man na congresista sa cadaclan na ipalaog bilang ingeniero, foreman, capataz, carpintero, mason, janitor, driver, clerk o secretario, basta siya igua sanang treintang tawo na puede niyang irecomendar na magabi sa tinampo.

Dae na ini puede ngonian, ta iyo an kapagbootan kan gatocaw asin gatindog na congresista.

Dae man pigclaro kan paraosip kung an cada gaaplay nin trabaho sa DPWH capiuhan bitbiton an application letter duman sa Batalay House of Representatives para maheling kung toltol an votante y an familia niya, gustong sabihon puedeng ilista para sa taraltagan sa 2025.

Sayang daa an ngalabngalab nin DE Arias na dae dapat pakialaman an hiwas kan saiyang mga tawo bilang proteksyon man sa trabaho ninda.

Kung noarin man ini sisipaon o voluntad na matakas paibong, dae pa isi.

*****

Nagvisita palan si Senador Mark Villar, an soboot silencio sana pero iguang nahaman.

Dae man daa siya makandidato sa 2025, ta an palugaran naman yata an tugang niyang congresista nin Las Pinas na si Camilla Villar. An ina ninda na si Senador Cynthia, an principal author kan House Bill na nagbansag sa Isla Maogma bilang Abaca Capital of the Philippines, magraduar na sa servicio.

Alagad base sa mga tarpaulin asin pamaypay na pinanaltag sa convention center pati na an urit-urit na patugtog kan saiyangh jingle, macandidato na ini.

An halangkaw na posibilidad iyo an magin bise presidente ni Sara sa 2028, ta ini kinua ni Digong bilang DPWH secretary kan congresista pa sana si Mark.

Maayad-ayad man ini si Mark Villar, minsan kulang an ribok, iguang nahaman, bakong arog kan iba tang mga magcapirang miembros nin consejo na pignombraran na bilang chairman kan Committee on Silence, he! he! he! Mga masakit pang hanapon nin mga parasolocit ta sigeng patago, he! he! he!

*****

Iguang galuwas na huringhuding na macandidato bilang alcalde nin Virac si dating Congressman Sarmiento.

Paborable daa an reaksyon kan saiyang hinaputan kan pagvisita caini sa Isla Maogma dae pa sana naawat.

Tibaad habo na mag-congressman ta kinahon na cuarta an caipuhan.

Maguiromdoman na nagsabi na daa ini na kung saen daa macandidato si Gob Cua, malaban daa siya.

Ngonian ka, dae pa man cierto kung talagang mababa sa Virac an gobernadora ta tibaad magdiretso pa ini sa capitolyo.

Alagad, an gusto kan cadaclan, si Boss Te naman an magtocaw sa trono para mapurbaran man kan mga tawo.

Saro pa, caipuhan kan alyansa na manteniron na an Virac nasa saendang lado lalo na ta maitaas si Mayor Sammy bilang congresista.

Kung hehelingon ta an resulta kan 2022 elections sa Virac, si Boboy Cua nakakua nin labing veinte cuatro mil na voto sa pagkagobernador.

An dating alcalde na si Posoy binotohan man nin labi sanang veinte mil na votante.

Si ex-Cong Saryo nakakua sana nin halos catorce mil na voto, alagad ini daeng bayad ta dae man nagbubod ning bahog. Inano daw kung magkurukay pa?

Adyan man si Bise Mayor Arlynn,  na nakaagahid nin veinte cinco mil na voto kang 2022, mapurba man sa pagca-alcalde….