Kung mamiyesta kamo sa Pandan, igua kamo diyan maaguihan na pigagibong tinampo bago maglaog sa Caramoran población.

Parte ini kan by-pass road na piga implementar kan DPWH, an construction company y bangko kan mga congresista.

Ini soboot an phase 2 kan proyecto, na piga implementar kan GCI Construction & Development Corporation.

Dae man daang problema an phase 2, alagad kung pano ini ginana kan contratista, iyo an magayon na istorya.

Segun sa mga sehongan sa oficina ni Director Eduarte, an Phase 1 kan Caramoran Poblacion By-Pass Road gakahalaga nin P101 million y pinun-an kan contratista kan Enero 28, 2022.

An revised expiry date kan contrata Deciembre 31, 2022, y an mga ingeniero sa DPWH regional office nag-isyu na ngani nin sertipiko na an proyecto ciento porciento nang haman kan fechang ini.

An problema, dae pa man daa haman entero an proyecto kan inisyu an sertipikong ini. Sagkod ngani kan nacaaguing semana, igua pa daa duman nin garodelyo nin mga tambak na daga sa tinampo.

An ultimo sa apat na box culvert, nahaman pa sana dae naawat y dai pa ngani nariprapan an gilid.

Ngonian ka, igua na nganing daculang contratista na nagreclamo kan anomaliyang ini y sinuratan na ngani an amok an DPWH duman sa central ofis.

Isinumitir kasabay sa surat an sertipikasyon kan consejo nin barangay Bothoan na sige pa an patrabaho kan contractor kan Abril 15, 2024 base sa inspeksyon na ginibo kan mga opisyal nin barangay.

An gustong sabihon caini, sabi kan reclamador, an ginibong Statement of Work Accomplishment kan mga personajes nin DPWH regional office peke asin binombahan.

Evidencia ini soboot kan kumplotan kan DPWH asin an contratista para dayaon an gobyerno pati na an publico (cabale an mga macuapo ni Nestor).

Cotana, binalewala na ni Director Eduarte an contrata y pigblacklist an contractor segun sa Republic Act 9184, alagad pinabali pa daa ini sa mga pa-bidding nin proyector sa Camarines Sur y Catanduanes na gakahalaga nin sobrang un bilyon pesos.

An problema ngonian ta tolong bulan na an nacaagui, dae pang simbag an pinakaamo kan DPWH sa reclamo, minsan pinadarhan nan in follow-up letter.

Magayon caini, ireclamo na sa Ombudsman an DPWH Secretary sa dae pagsimbag sa surat sa laog nin quince dias.

Iyo man siguro an guibohon sa Commission on Audit sa region y national office na sagcod ngonian dae man nin magcacanigong aksyon sa reclamo kan municipio nin Virac sa dae pa nahaman na Provincial Integrated Terminal and Business Complex diyan sa San Isidro Village.

Maguiromdoman na an proyecto na pinondohan nin lampas dos cientos milyones pesos, soboot inako na kan dating administrasyon ni alcalde Posoy, na nagpirma na sa Certificate of Acceptance and Turnover.

Alagad, sagcod sa ngonian, dae pa ini nakabitan nin corriente ta daeng transformer na cotana an contratista an matao.

Ta sige an uran kan mga nacaaguing aldaw, ciertong pano na naman nin tubig an basement o irarom kan business complex.

Kung ngata dae pa man ini piga kanghan nin tilapia y buyod ni alcalde Samuel, dae ta isi. Dae man daa puedeng supsupon an tubig ta dae maandar an mga water pump ta daeng corriente.

Pakatukaw daa kan bag-ong alcalde, dagos na ining pigreclamo sa COA regional office alagad daeng nangyari. Aduman naman dinara sa COA head office an reclamo, pero sagcod ngonian dae pa man nin simbag.

Tibaad dae sana gahiwas an DPWH regional office y an COA ta dae na puedeng pugaon an contratista, natitian na kan mga buwaya sa DPWH, an gatindog na congresista y mga parahagad sa LGU, he! he! he!

*****

Inaapodan an gabos na votante na magpadangog-dangog na sa mga midbid na lideres nin mga politico.

Gapalista na daa an campo kan gatocaw na congresista kan mga maresibe nin bubod sa masunod na eleksyon.

An mga sa dati sana, adyan na man siguro sa listahan, alagad pigalinigan siguro an listahan sa ngonian para makaris an mga nagsuwail kan nacaauing baracala, ay sala, eleksyon.

An mga harop-haropon sa panaltag, siguradong maambisyon na makabali sa listahan nin gabos na candidato, alagad igua man nin disbentahe ta maisihan man sana kan mga politico kung an votante aduman man nakalista sa ibong na campo.