Harani na daang maubos an pasensya ni DE Simon Arias diyan sa mga cagamohan sa DPWH Catanduanes Engineering District.

Igua na naman pan-ong simbagon an saiyang oficina manongod sa reclamo sa pa-bidding nin mga proyecto, lalo na an mga proyectong bako man an enot na congresista an nagpapondo kundi an panduwang congresista.

Nacarecibe na daa nin mga surat si DE Arias manongod sa problemang ini alagad dae pa naisihan kung ano an eksaktong laog kan reclamo.

Kung harimbawa dae na matios kan bag-ong DE an camogtacan niya, siguradong dae n aini mabarik sa Isla Maogma y duman na malaog sa sabodan nin mga DE na dae oyon kan nacatocaw asin nacatindog na congresista, he! he! he!

*****

Piyesta na palan sa Payo, an banwaan nin kinis alagad kulang an kinis, sa saendang pagselebrar kan kaaldawan ni Senyor Santo Santiago.

Paka sarong semana, susundan naman ini nin Pandan, sa kaaldawan ni Senyor San Ignacio de Loyola.

Ciertong mapurunta na naman an mga politico y mga ambisyosong maging politico, tanganing magpahiling sa mga votante kan duwang banwaan y makipataratara sa saendang mga lideres.

Pakarihis nin siyam na aldaw, masunod man an Baras, sa kapiyestahan ni San Lorenzo. Alagad tibaad sa gilid-gilid sana an sarong bida sa politica, ta tibaad dae invitaran sa pabayle kan mga hade nin municipio, he! he! he!

Masabotan man huba kan mga ciudadano nin Baras kung ngata, lalo na ta tinabag daa caini an mga proyectong bako niya man na dinisponeran, he! he! he!

Sa Agosto 15 torno man nin municipio nin Viga, na maselebrar kan kaaldawan ni Nuestra Senora de la Asuncion.

Iyo na ini an ultimong daculang kapiyestahan bago mag-abot an pagsumitir nin Certificate of Candidacy (CoC) kan mga nacatocaw asin gusto magtocaw na mga politico.

Caya amot-amot pang bubod an caipuhan kan mga ini tanganing mamantener an saendang mga lideres na puro mahalat nin asistencia tanganing dae maubusan nin inumon para sa mga walang tamoy sa libre, he! he! he!

*****

Sagcod sa ngonian, dae pang aviso an Provincial Veterinary Office kung ano na an resulta kan mga ginibong pag-eksamin kan mga blood samples na kinua kan mga municipio sa piling mga orig sa onceng banwaan.

Sa paaguing ini cotana maisihan kung nagkalat an ASF hari sa Caramoran y Pandan, asin kung anon a an masunod na gigibohon, lalo na ngonian na namroblema na an mga parabuno y parapabakal nin carneng orig kung saen makua nin bunoon.

Natapos na lamang an kapiyestahan nin Caramoran y Bagamanoc, baguing dae pang noticia an nasabing oficina.

Dae man cotanang problema sa mga parakaon nin carneng orig kung an saendang pigabakal na carne hari man sana sa laog kan saendang municipio.

Ta kung igua man nin darang virus an saendang kinaon, posibleng sadiri nindang orig sana an maolakitan kung bahogon nin sagmaw na iguang carneng orig na tada.

An hapot kan sarong pilosopo, kung caipuhan daang ibawal an pag-sharon nin rinutong carneng orig kan mga makipiyesta?

Segun sa saiya, puede pa daang makumpiskar kan mga Bantay-ASF checkpoint nin mga municipio an buhay asin hilaw na carne, lalo na kung bako man na mga SUV an sinakayan.

Alagad baguing deficil na harangon an mga mahilig magbitbit nin rinuto paribod sa ibong na banwa, lalo na kung ini nasa tulak na.

Mas lalong masakit kung paparahon an mga ini, nakamotor man o tricy o kaya sa Fortuner nakasakay, para hapoton kung sinda nagcaon nin humba, morcon, embutido, pork steak, lumpiang shanghai, lechon, lechon kawali o roasted liempo….