Igua pang nadagdag na mga suspetsado na gakalat kang black propaganda manongod sa soboot pagdagsa nin mga Intsik sa Isla Maogma y an soboot pagkamkam kaini kan mga negocio sa isla, cabali na an gabos na mga establisimiento sa media.

Kinaykay daa kan brodkaster y dating alcalde nin Pandan, Resty de Quiros an isyung ini laban sa mga Cua sa saiyang programa sa radyo sa Maynilang kayganda na an espesyal na bisita iyo si retiradong heneral Macairog Sabeniano Alberto.

Saro pa daang ciudadano nin Pandan an kaibahan sa planong ini na palatawon an pangaran kan heneral bilang preparasyon sa pagcandidato bilang gobernadora sa masunod na taon.

Kabali an saro man na dating politico na gun-for-hire na ngonian, an campanyang ini bako sanang panguyag kan pangaran nin mga Cua kundi insult man sa mga mahigos na kagsadiri kan mga establisimientong inakusaran nindang mga Intsik an tunay na kadsadiri.

An magayon na hapot sa dating heneral y mga kaalyado caini, ano man daw an naitabang kan opisyal na ini sa mga taga-isla kan panahon na siya nasa puwesto?

*****

Pareho sa nangyayari sa mga banwa kung harani na an piyesta, gaarabot an mga chucheria, mga paratinda nin plastic, bado, tsinelas, tabo, serotso, katam, selpon, ponda asin iba pa na cadaclan gibo sa China.

Ta tolong bulan na sana, maabot na an pagsumitir nin Certificate of Candidacy (CoC) sa COMELEC para sa 2025 national and local elections, mapahiling na man sa mga tawo an mga pinangaturugan na maging amo sa capitolyo o sa Congreso.

Sa mga maabot na semana, abangan an mga tawong ini, na sa panahon na nangaipo an constituentes, dae mo mahiling na maglabad-labad ta natakot hagadan nin tabang, he! he! he!

Mayad pa si Gob Boboy Cua o si Bise Gob Bos Te ta puede lanihan, lalo na ta binaba an sentensyang sarong taon na suspension sa gobernador na inimponer kan Ombudsman y pinasunod kan DILG minsan lampas na sa saiyang termino kan 2019.

Ta sarong bulan na suspension na sana an itinaong penalidad, an gustong sabihon puedeng makakubra an gobernadora kan backpay o sueldo niya sa laog nin onceng bulan.

Sigurado man sanang dai ini malaog sa saiyang pitaka, ta haharagadon na naman kan mga nangangaipong oro aldaw gapila sa Capitolyo.

*****

Bag-o na palan an amo sa Eastern Bicol Medical Center.

Pormal na daang nag-asumir bilang OIC an dating chief of hospital kan JMA Memorial District Hospital na si Dr. Bessie Rodulfo-Zafe, an agom ni PBM Santos Zafe.

Helingon ta kung anong mga pagbabago an mangyayari sa pinakadaculang ospital kan provincia, lalo na ta pinatanidan na kan Commission on Audit (COA) an Capitolyo na madagdagan an ganancia kan EBMC bilang economic enterprise o kung dae ibarik ini sa dati.

*****

Bag-o na man an amo sa DPWH Catanduanes Engineering District.

Bako daang kagibohan kan Batalay House of Representatives an pagtocaw ni DE Simon Arias, na awat naging amo sa Masbate, kundi desisyon kan Central Office sobra nang sambulan an nacaagui.

Pagtungtong daa caini sa saiyang oficina, pinalayas an mga tawo sa oficina na hinubon ni DE Cagomoc ta siya daa nagdara nin sadiri niyang tawo – duwang mabantay sa oficina y duwang bodyguard.

Inda kung ngata caipuhan pa nin bodyguard, tibaad nasanay sana ini sa Masbate na dae natapos an bulan na daeng baradilan. Uya sa Isla Maogma, iba man na badil an gaputok, nakabuhay bakong nakagadan, he! he! he!