Ta dae daa napatanos an pa-bidding nin mga proyecto sa DPWH, igua naman nin rigodon na mangyayaro diyan sa oficina sa maabot na Lunes, Hunyo 3.
Segun sa mga chismoso, ma-tolong semana na daang dae galaog sa saiyang oficina si OIC-DE Denic Cagomoc, aduman daa sa saiyang mahal na probinsiyang Samar gatambay.
Puro daa problema pan-o an DPWH Catanduanes, atang kulang na an deligencias posibles, bako pang ingeniero kundi duwang politico an tunay na district engineer, he! he! he!
Caya daa an naisipan kan tiyo niyang director, magtukalan na sana nin puwesto an mga amo kan Catanduanes y Masbate.
Sa Lunes, igua naman nin turnover sa DPWH, na an magiging OIC iyo si Engr. Simon Arias y si Cagomoc duman sa Masbate mang-aagahid.
Si Arias na an pang-apat na ingeniero kan DPWH Catanduanes District Engineering Office sa termino kan presenteng mga amo caini, an duwang congresista nin Bato.
Sabi pa kan mga sehongan, si Assistant DE Max Eleda target man daang tukalan kan Batalay House of Representatives ta bako daang epektibo sa pagpaluwas nin mga tamang magana sa pa-bidding.
Saro pa, sige daa an gumod-gumod caini kasabay an saiyang amo, na dae lamang daa makabakal nin sarong long-neck na Stateside an deligencia sa Catanduanes DEO, lalo na ta nasagara an ilig nin tubig sa ba-haw, he! he! he!
Kung siring an mangyari, duman naman ini isabod sa tambayan nin mga hinabuan na DE sa regional office.
Alagad, mahubon ini nin daculang problema sa oficina ta si ADE Eleda an chairman nin BAC, caipuhan na naman magpa-aprobar nin bag-ong chairman sa central office caya posibleng maabara an pagpabidding nin mga proyecto.
*****
Dae pa palan daa nakasumpa sa Supreme Court an saro sa doseng nakapasar sa Philippine bar exam kan nacaaguing Septyembre 2023.
Nasil-ipan daa kan espiya nin mga interesadong kahimanwa an isinumitir caining sworn affidavit sa Padre Faura y nareparo ang salang simbag sa sarong hapot.
Dae daa itinuga an totoo sa hapot na ini, na saro sa mga kahapotan sa mga aplikante sa trabaho pati na sa pagparehistro sa PRC bilang propesyunal.
An hapot man sana daa kung igua siyang kaso administratibo, civil o criminal laban saiya sa arin man na korte sa enterong Pilipinas.
An simbag daa dai, pero an sabi kan mga reclamador igua.
Bahala na an Supreme Court sa bagay na ini.
*****
Iguang nagreparo kan marinas na pag-estimar kan Isla Maogma sa mga nag-arabot na visita hari sa manlaen-laen na lugar kan rehiyon Bicol na nag-atender kan Regional ALS Encampment pati na an mga visita sa Regional Science and Technology Week.
Duman daa sa pagcamping nin mga out-of-school youth y ALS teachers, binuksan daa an magcapirang escuelahan para estaran kan mga visita y an mga nagtogdoc nin tent sa athletic complex tinaw-an pa nin marinas an suplay nin tubig asin corriente.
Sinurundo pa ngani daa in ikan mga vehiculo nin LGU Virac duman sa Calolbon ta naghagad nin tabang an ALS qui alcalde Samuel.
Kan mag-arapura na paribod dahil sa gadangadang na bagyo, iguang nahubon an tres cientos katawo sa pier nin Calolbon. Duman sinda pinaestar sa SAVS, hinatudan pa nin pagcaon kan Capitolyo.
An mga na-stranded man na nagpartisipar sa RTSW, tinawan man daa nin asistensya pinansyal kan municipio nin Virac, hinatod pa sa pier.
Daing masabi an mga visitang ini sa mga pag-estimar kan mga taga-Islang Maogma.
Nacomparar lugod an tratamiento nin mga taga-ibong sa mga na-stranded man na taga-isla diyan sa makanos na terminal nin Tabaco port.
Daeng ibang gapakaon o gatabang saenda kundi an probinsya nin Catanduanes.
Masque an PPA daeng pakialam, buta bongog sa reklamo nin mga pasaherong gabayad nin treinta pesos cada agui sa terminal na pilang taon nang uruyag, mainit ta daeng aircon, taklaon na an mga tocawan y mabata pa an kasilyasan, pwe!