Igua na naman palan nin dinulag na fondo an gatindog na congresista hari sa DPWH Catanduanes pabaryo sa regional office.

Segun sa mga chismoso diyan sa San Isidro Village, sobra daang quinientos milyones pesos na fondo nin mga proyecto an pinadara na naman kan guromoc na district engineer dae pa sana naawat.

Minsan daa mga consideradong sinsilyong mga proyectong gakahalaga nin sarong milyon sinabod sanang basang sa region para sana dae makakua nin trabaho an mga local na contratista pati an saendang mga hornal.

An makulog pa daa ta dae lamang pinaisi an Bids and Awards Committee na pinun-an na daa cotana an proceso para sa bidding kan mga proyecto.

Maguiromdoman na labing dos bilyones pesos an halaga nin infra projects kan DPWH sa Islang Maogma, alagad an mga ini bako man gabos sa gatokaw na congresista. An sarong bilyon daa hinanapan ni Cong. Zaldy Co kan Ako Bicol y an seis cientos milyones hari man qui Cong. Bong Teves kan TGP.

An dara man sana daa ni Cong Yoloyo y pag-iribang congresista kan Batalay House of Representatives nueve cientos cincuenta milyones kung dae ako nasala y an cadaclan caini aduman pinaimplementar sa DPWH regional office tangani sanang dae makinabang an mga trabahador sa Isla Maogma, pati an an mga hardware store y parapabakal nin graba y baybay.

Ngonian ka, ano man sana daw kan kaibahan ni DE Denis Cagomoc na si Assistant DE Maximo Eleda, na iyo an chairman kan BAC?

Ano man sana daw kan mga amo y project engineer sa oficina na gahanap man kan saendang deligencia?

Mayad pa siguro an pinakaamo ta tibaad pinangakuan nin tres porsiyento kan halaga nin mga proyecto caya sige sana an rosnos sa kung anong papel na iatubang saiya.

Sarong taon y duwang bulan na sana eleksyon na naman. Maghorop-horop man cotana an mga votante sa pagpili nin congresista.

Tibaad duman naman kamo sa buy-one-take-one minsan sangribo an panao, lugi an banwaan. Magpili man nin taga-Isla Maogma, bako itong uya sana para magtabag asin magpaanos…

*****

Nagsunod man palan sa aviso kan Commission on Audit an manejamiento kan Catanduanes State University manongod sa soboot dae man kaipuhan asin magastos na pakaon sa mga regular man sanang pamiting.

Kan nacaagui palan na Lunes sa Year-End Report na cotana kan Deciembre y ginibo kan Febrero dose, mirindalan sana daa an tinaltag sa mga nag-atender na opisyales, empleyados y estudyantes.

Ta kulang pa siguro an tawo, imbes na naamay an pagpoon, alas diez na daa nakataramtaram an enot sa veinte-unong deans, mga bise presidente y iba pang amo.

Pag-abot nin odto, siyam pa sana an nakatapos, kaya dinesisyunan na ipasingit na an mensahe kan presidente.

Natapos daa an pataratara manongod sa mga pangaturogan maala-una. Pinaparibod na lang an mga presente ta dae man nin presupuesto para sa pangodto.

Maray na ideya, ta kung dae, an cadaclan dae na mavuelta ta tibaad sagcod pamirindal nin hapon dae pa.

Caya an mga natada daang mga ma-report na mga amo, duman na sa conference room nin main building nagpasay kan saendang tataramon, he! he! he!

*****

Sa otro taon, reparohon na naman ini kan mga auditor.

Ta sa pagcaisi nin gabos, an ulat panlalawigan an gobernador an gataram. An ulat sa municipio, trabaho an nin alcalde.

Masakit an gibong ini, ta an pagheling kan tawo, dai nakasolo an amo….