Dae na palan mabalik si OIC-DE Denis Cagomoc sa DPWH Catanduanes.

Segun sa mga sehongan, nag-aplay daa ining DE duman sa ibong alagad dae man nakua caya malataw-lataw man ngona ini duman sa kadagatan kan regional office kaiba an mga among hinaboan kan mga congresista sa Batalay House of Representatives.

Ngonian ka, totocalan daa cotana ini nin joven pang ingeniero na aqui nin dating halangkaw na opisyal sa regional office, alagad sinayumahan naman daa kan gatindog na congressman sa kung anong rason.

An mayad caini, dae na pagkanghan nin amo an DPWH Catanduanes ta dati nang iguang amo na iyo man sana an nasusunod.

Caidto, magpoon qui ex-Cong. Dayunyor, ex-Cong Cotipyo, ex-Cong. Saryo y ex-Cong. Hector, an mga DE an minapalakaw kan oficina y mga bidding nin mga proyectong pambahog sa mga politicong ini.

Ngonian, sabi ngani kan mga Marites sa oficina, si Madam daa an gaboot kung sisay an matocaw sa vacanteng puesto y malaog na mga casual, noarin an pa-bidding asin sisay dapat an magana,

Nangyayari daa ini ta an mga napaboran na mga ingenierong may kapot nin mga puesto dae puede magsayuma ta tibaad isabod man sinda kung saen na lugar, he! he! he!

Pabor man siguro ini sa hinubon na assistant DE, ta madacula an saiyang parte kan barangaon sa mga mejoras nin proyecto, afuera na sana kung pag-interesan man ni DE Madam, he! he! he!

*****

Igua palan nin kaso an magcapirang opisyal y miembros nin Catanduanes Knowledge Pantry, na invuelto sa mga nacaaguing actividad sa CatSU, an Discutiran 2023 asin an pagpaapod nin mga SK.

Segun sa reclamador, hinabhab daa kan mga ini an dinonar na mga pagkaon na daeng permiso minsan iguang patanid na bawal gamiton an mga ini kan taga-CKP.

Kasong criminal siguro an reclamo, ta pagbalga daa ini sa Articulo 309 kan Revised Penal Code manongod sa pagtabag nin bako mo.

Dae ta man nahiling an reclamo caya dae kita makasiguro kung tama an alegasyon asin kung gurano man an hagad an danyos kan reclamador.

Marinas man na nacaluwas an bagay na ini tanganing maisihan kan mga tawo sa rikod kan EduKain project kan unibersidad na bako sana palan an mga pobreng estudyante an dapat pakaonon nin lugaw, he! he! he!

*****

Dae pa daa naori-an si atorni Puting Buhok sa isyu kan ambulansyang pinasubri kan gobyerno provincial sa CatSU.

Segun sa saiya, gahanap siya ngonian nin kopya kan Memorandum of Agreement tanganing maheling kung ano an mga kondisyones caini sa paggamit kan equipaje.

Dae man daa puedeng ipaagui sana sa internal arrangement o simpleng horon-horon an paggamit kan ambulansyang binakal gamit an buwis na binayad kan publico (kaiba an mga macuapo ni Nestor).

Dae man nagtao nin cuarenta y ocho oras an abogado sa duwang lado siring kan ginibo kan sarong hababa, ay sala, halangkaw na opisyal.

Alagad oras na macompleto niya an saiyang mga papeles na dae pa naribod an ambulansya, igua daang problema an nga invuelto.

Habang dae pa man nin aviso si atorni Puting Buhok y dae pa man nakabakal nin duwang bag-ong ambulansya an CatSU, magayon na gamiton na ngonang ambulansya an saro sa apat na bus na binakal nin manejamiento sa halagang P4.5 million cada saro.

Mas marinas pa ini ta dacul an makasakay, puede pang pasabayan nin mga gaadal nin nursing, y ano man na oras habang gaviaje papunta sa EBMC, puedeng gamiton an CR sa rikod kan bus kung makamati nin dae puedeng ikasugo, he! he! he!