Ang sabi palan daa kan gatocaw na congresista sa Batalay House of Representatives, siya daa an naghagad sa Bureau of Fire Protection (BFP) kan apat na bag-ong bumbero na tinao pa sana kan nacaaguing semana sa Virac, Bato asin Baras.
Dae man sinabi kung pano naghagad an congresista, tibaad nagpadangog man sana kan Oktubre kan dangogon kan Lower House an budget kan BFP.
Alagad an totoo kaiyan, awat nang hagad ni alcalde Samuel Laynes nin duwang bag-ong firetruck sa BFP. Adyan daa an resibo, mga surat na naresibe kan liderato nin BFP sa Quezon City caya dae magsabi an congresistang gatocaw na siya an kag-proponir caini.
Kung gusto daa kan Batalay House of Representatives, padarhan sinda ni alcalde nin kopya kan mga surat.
Saro man na dacula an papel sa pagtao nin bumbero sa isla iyo si TGP Congressman Bong Teves, na iyo an nagpara-follow-up kan bagay na ini sa liderato nin BFP.
Kung dae man daa nangulit an icatolong congresista nin Isla Maogma duman sa QC, dae man mangyayari an apat na firetruck, intiendes?
*****
Kung nacanamit daa kamo nin ham hari sa pata nin orig, makipustahan daa an mga parasunod ni alcalde Samuel na awat na nindo ining dineposito sa kubeta.
An sigurado daa, mas masiram y mas halawig sa isip asin tulak an serbisyo ni Sam, malinis na, mabilis pa, maguilomdoman hanggan 2025, he! he! he!
*****
Segun sa magcapirang miembro nin media, bagui daang aquing saday an gatocaw na congresista kan inin mag-privilege speech sa Kongreso tanganing tabugaon an Capitolyo sa soboot pagproponir kan small scale coal mining ordinance.
Hinigpitan pa daa caini an palakaw sa permiso sa quarry alagad igua man sana daang nakalusot.
An problema kan argumento kan congresistang halangkaw, dae daa nabanggit an pagmina kan saiyang companya nin graba asin baybay diyan sa baybayon nin Batalay para gamiton sa seawall construction project nin DPWH.
Dae man daa caini nabanggit na nadakop ngani an sarong barkong graba asin baybay hari sa ibong na pinuslit sa Isla Maogma na daeng permiso sa mga awtoridad.
Nakasuhan an saiya man sanang tawo na iyo an nag-asumir kan danyos.
Kung sabagay, bako pa man siyang gatocaw na congresista caidto…
*****
Matocaw na palan sa maabot na Enero an bag-ong miembro kan consejo municipal nin Virac, an dating administrador nin provincia na si Lemuel Surtida.
Siya an katukal ni defunto consejal Don Robert Maullon, na an puesto pirang bulan nang nabakante.
Dacula an magiging papel ni Surtida, bako sana ta siya naawat sa puesto sa ehekutibo kundi dati na siyang consejal.
*****
Dacul na naman na huringhuding manongod sa pulitika.
An enot na nagluwas, macandidato daang gobernador an gatocaw na congresista, an gatindog na congresista maambisyon magin alcalde sa Calolbon y an saendang aqui ma-alcalde sa Bato. Masalida sa Kongreso an nanaltag nin hamon. Buwa na naman ini, ta masiram an buhay sa Gatasang Pambansa, sige sanang habhab, he! he! he!
An icaduwang huringhuding, an pata an macandidatong gobernador ta palugaran an mga taga-Batalay House of Representatives.
Dae pa dindi cabali an anuman na mga plano ninda dating Cong. Hector Sanchez, ex-Cong. Cesar Sarmiento, ex-Cong. Joseph Santiago, ex-Gob Araceli Wong y ex-Mayor Posoy Sarmiento.
Kung ano pa ang mangyayari sa maabot na bag-ong taon, halaton ta na sana….