Duwang semana na nacaagui, igua nang nagluwas na osipon na an alcalde nin Baras, Jose Paolo Teves III, pigaconsiderar daang magin candidato sa pagca-congresista laban qui Cong Yoloyo y kung sisay pa an malaban.

Segun sa huringhuding, minsan aqui pa daang hilingon si Paolo, naluto na man ini kan duwa niyang termino bilang alcalde y dacul man an saiyang naginibohan para sa saiyang mga constituentes sa Baras, siempre sa tabang kan saiyang ama, si Cong. Bong.

Ngonian daang semana, igua nang mga maribot na mga parasunod kan mga Teves para bati-on an pulso kan banwaan, lalo na an mga taga-baryo, sa posibleng kandidatura caini sa 2025.

Kung ini mangyari, posibleng makalaban caini bako sana si Cong Yoloyo y an saiyang backer na icatolong congresista, kundi an alcalde nin Virac na si Samuel Laynes na awat nang pigamanok nin magcapirang mga politico.

An importanteng guiromdomon iyo ini: kung sisay man an makakua kan basbas kan mga Cua, iyo na an an magana.

Si dating Cong. Hector nadaog ta dati nang daendata an imahe sa cadaclan, lalo na ta nawara siya kan panahon nin pandemya. Caya ngani binotohan si Yoloyo ta dae nang ibang mapilian na namakal nin voto, lalo na ta si Atorni Puting Buhok dae man binuhian an saiyang mga teksas, he! he! he!

Awat pa an 2025 y dacul pa an mangyayari na posibleng makaafecto sa pipilion kan mga Cua. An cierto sana sa ngonian iyo ini: dae pa ngani natapos an santaon, an hiling na kan mga parapabakal na votante qui Cong Yoloyo, dae na makaotro, he! he! he!

*****

Naghapot na palan si Consejal Virgilio Candelaria kung ano an gigibohon kan Sangguniang Bayan nin Virac sa nagluwas na documentong gapatunay na kan Enero 2022, pinirmahan na ni dating alcalde Posoy an turnover y 100% accomplishment report kan Provincial Integrated Terminal and Business Complex (PITBC) diyan sa San Isidro Village.

Sagcod sa ngonian, mahigit sarong taon matapos pirmahan an soboot completo nang proyecto, dae pa daa ini nahaman.

Sabi ngani kan mga trabahador kan contratista, sarong bulan na man daa sindang dae nasueldohan. Pirmi daa ining nangyayari magpoon pa caidto, caya siguro awat mahaman.

Baguing daeng mangyayari sa hapot kan veteranong consejal.

An ibang miembros aduman sa campo kan dating alcalde na iyo an naghagad kan fondo sa Malacanang. An sekretarya kan consejo fiel na loyalista kan dating alcalde na iyo an numero unong kwalipikasyon caini sa trabaho.

Sabi ngani kan mga chismoso, mas nagamit daa an sofa sa oficina kaysa sa tuwad-tuwad na tocawan, he! he! he!

Dae man daa ini maaksyunan kan bise mayor ta iguang utang na boot sa duwang dating alcalde, sabi kan mga sehongan sa consejo.

An saro pang hapot, kung advance an pagpirma kan turnover y certificate of 100% accomplishment, ano pa daw an advance na nangyari?

*****

Naging matriumpo an 2023 Gift of Love mission kan United Catanduanes San Diego (UCSD& Friends.

Lampas cuatro mil katawo na nakinabang sa saendang libreng servicio medical, dental, OB-Pediatrics, optical y mga regalo.

An misyon ginibo sa piling barangay sa onceng municipio, bako na sa ospital. Ini daa tanganing dae na mamasahe nin ginatos an mga pasyente para sana magpunta sa EBMC.

Maguiromdoman na kan 2020, binawalan kan PHO an grupo na magconducta kan medical mission ta tibaad daa magdara nin Covid virus sa Isla Maogma.

Tapos na lamang an panartag nin bolong kan UCSD, ni saro daeng naghelang sa mga lugar na binisita ninda.

An gustong sabihon daa, kapritso sana an pagpatonong kan saendang medical mission, pwe!

Sabi ngani kan maculog an daghan na volunteer, kung bako sana daang sa paghengoha nindang makatabang, dae na sinda makihoron sa mga opisyal na maluya palan an resistenya sa helang….