Nagpamiting na daa nin mga contratista si Congressman Yoloyo duman sa beach house sa Batalay.

Aduman daa an duwa o tolong bigtime na contractor y an iba puro na mga saraday.

Saro man sana daa an mensahe kan congresista, na an mga proyecto daa sa DPWH ipapanaltag niya sa saenda.

An gustong sabihon, dae daa makua si Cong nin project para pambawi sa mga ginastos na milyones kan nacaaguing eleksyon.

Aduman daa an saiyang alalay na dating alcalde alagad an pantolong congressman dae nagpaheling. Tibaad aduman sa laog nakamaan sa CCTV na sagcod daa kan Sabado dae pa nabayadan sa nagkabit, he! he! he!

*****

Bako man sana palan na tolo an congresista sa Isla Maogma.

Igua pa daang pang-apat, aduman gaopisina sa DPWH, an paboritong agencia kan mga congresista y senador.

An saday daang congresistang ini, manartag man daa nin proyecto duman sa mga contratistang suwail, filosofo, palaban asin habo magsunod sa napagcaoyonan.

Kung paparanohon ini ta bako gabos na contratista nag-atender kan pamiting, dae ta isi.

Sabi ngani nin sarong regular na visita sa DPWH, dae pa ngani daa nagpoon an termino, gusto nang ipanartag kan grupo an mga maintenance na project na cotana para man sa panggastos kan mga taga-DPWH kung iguang visita an mga ini.

Sige sana kamong habhab sa bahogan kan DPWH, basta sigurohon niyong daeng tulang na makasabay sa paghabongar….

*****

Sagcod sa ngonian, dae pa nasimbag kan DepEd Catanduanes Division Office an kahapotan kan Tribune manongod sa endorsement caini sa Instabright Literary Awards.

Segun sa sihongan na taga-dibisyon, pig-endorse daa kan regional office pati na ni Mam Olay-Olay an Instabright, bagay na ginibo man kan magcapirang opisyal sa dibisyon.

Sabi daa, an mga maestro y maestra na masumitir nin saendang ginibong mga tula y mga hababang istorya tanganing manggana nin award, na puede naman gamiton sa promotion.

Agosto uno an deadline para sa pagsumitir kan mge entry, alagad dae pa ngani natapos an aldaw na ini, nakaresibi na nin noticia an mga nagpartisipar hari sa Instabright na an saendang pinadarang entry nakapasar sa mga standards.

An awarding ceremony daa duman sa sarong hotel sa Tagaytay sa fecha veinte siete y sinda tatawan nin sertipiko asin medalyon.

An hagad sana daa kan organizer, magbayad nin registration fee na dae mababa sa P2,520 an cada awardee y an deadline Agosto tres.

Dae man daa sinabi sa  noticia kung libre na an estar sa hotel, caya an cierto caini magastos an cada awardee nin dae mababa sa dies mil.

An problema, binawi daa kan opisyal nin dibisyon an endorsement sa award ta tibaad daa bakong toltol, caya nagkaproblema an mga maestro y maestra na nakabarayad na kan registration fee.

Hanggan kan Lunes na ini, dae pang pormal na simbag an manejamiento kan dibisyon kung valid pa an endorsement na ginibo kan opisyal sa Instabright Literary Awards.

An saro pang hapot caini, kung aaprobaran kan dibisyon an application for leave to travel kan soboot mga nangganang mga titser para makaviaje papuntang Tagaytay.

Kung sabagay, dae man sigurong mawarang golpi, lalo na ta national awardee man sinda minsan mag-absent nin tolong aldaw, he! he! he!

An importante iguang sertipiko y igua pang medalyang bulawan ang kolor, he! he! he!

*****

Lugi palan an mayoriya kan mga consejal na nagpartisipar sa nangyaring eleksyon sa PCL kan nacaaguing semana.

Kadiit sana daang naresibing paomok an mga ini ta daeng kalaban si PBM Joselito Alberto.

Cadaclan kan naheling kong mga consejal sa convention center mga musorot y malungsi, senyal na kulang an baribhi nin bitamina, he! he! he!

Baguing saro sana an nakaguda sa paglawod, nasolohan an dali, he! he! he!