Nalabnot palan an saro sa mga buya na binakal ning PPA sa halagang mahigit ocho milyones pesos.

Segun sa mga nacaisi, naatrasan daa nin sarong barko an kadenang nakagakod sa angkla caini sa irarom nin dagat caya napatod.

An hapot, ano daw kung igua na lamang nin ginibo an PPA na pagpabayadon an kagsadiri ning barko sa danyos?

An problema tibaad mag-arog man ini sa nangyari duman sa tidal sensor kan gobyerno diyan sa pier na nasagi man nin barko.

Sagcod sa ngonian, dae pa ini nahingayad tanganing magamit harimbawang iguang magdangadang na tsunami.

Kung sabagay, an kaya man sana kan mga taga-PPA na bugawon iyo an mga parabanwit na gusto man cotanang magtunton diyan sa gilid kang pier.

*****

Dae pa ngani naresolveran an dacul na problema sa EBMC, igua na man nin iimbestigaran na kaso.

Naotsan daa an sarong siyam na bulan na aking lalaki matapos na masobrahan nin anesthesia habang nasa minor operation.

Segun sa mga chismoso, an opisyal daang dahilan kan pagkagadan kan omboy “acute cardiomyopathy secondary to anaphylactic shock.”

An “cardiomyopathy” segun sa libro sarong helang sa puso na namana o poon pa pagkamundag. Kung ngata dae ini nareparo bago pa man inoperaran an omboy, dae pa isi.

Hinampang na daa ni gobernadora an magcapirang doctor kan EBMC tanganing maisihan kung ano talaga ang nangyari sa cotana simple man sanang operasyon.

Halaton ta an manejamiento kan ospital na magpaluwas nin report.

******

Nadagdagan nin veinte dos na bag-ong kaso nin COVID-19 ang Isla Maogma.

An gustong sabihon, an veinteng kaso kan sarong semana, tinampadan sana nin sarong aldaw.

Iyo na ini an an resulta kan pagpasepara sa hurit kan gobyerno na an publico (bako sana an mga macuapo ni Nestor) padagos sanang magsul-ot nin face mask y magdistansya sa ibang tawo.

Lalo pa ining malangkaw ta nagpoon nang magbalik sa mga escuelahan an mga estudyante, lalo na an mga gakolehiyo.

Harimbawang madagdagan pa an bilang na ini, tibaad ibalik na naman an isla sa Alert Level 2 or 3.

Atang mahal na an mga barakalon dahil sa halangkaw na presyo nin petrolyo, papagtioson na naman an mga tawo.

*****

Catolicong padi palan an chief of staff ni Congressman Yoloyo.

Segun sa mga surat na pinaluwas kan district office, duman ngona daa maoficina sa saiyang residencia sa Batalay an congresista y an chief of staff.

Bago pa daa an campanya, awat na daang nasa campo ni Yoloyo an reverendo padre y nagtabang ngani sa campanya hanggan ini manggana.

Dae man sigurong problema kung siya an magkapot kan oficina sa Isla Maogma lalo na kung iguang permiso an saiyang diocesis duman sa Canada.

An medyo alanganin sana, isi kan gabos na an saro sa trabaho nin congresista, siring sa mga politicong nanggana, iyo na bawion an pinamakal nin voto.

Mayor dindi an paghagad kan parte kan congressman sa mga milyones na proyecto sa DPWH.

Dae man siguro ririboton kan padi an mga contratista na siya nakasutana o caya bitbit an kahangan nin sinsilyo nin simbahan, he! he! he!

Tangani na maging malibyano ang saiyang trabaho, magayon na arkilahon na sana an sarong harong diyan sa tampad kan DPWH para gibohon na satellite office.

Ini para dae na man masakitan an mga parasunod na mga contratista y dae man mamroblema nin hanap sa mga ini oras na makakobra kan saendang pinagalan sa cahera kan DPWH, he! he! he!

Mag-empleyo nin sampulong sikyu y an cada mapasinsilyong contratista iguang escort papunta sa bangko asin pabalik tanganing cierto y sigurado an donasyon para sa campanya sa 2025, he! he! he!